الثلاثاء 26 أكتوبر 2021
رئيس مجلس الإدارة
أيمن فتحي توفيق
رئيس التحرير
أحمد الطاهري
رئيس مجلس الإدارة
أيمن فتحي توفيق
رئيس التحرير
أحمد الطاهري

البلكونة

فى علم الإدارة فى منهج اسمه القيادة التكيُّفية (Adaptive Leadership) وده حطّه 2 من المتخصصين اسمهم  Linsky وHeifetz وهو إطار عمل عملى بيساعد الأفراد والمؤسّسات على التكيُّف مع البيئات المتغيرة والاستجابة بفعالية للمشاكل والتحديات بشكل سريع.



فى المنهج ده تعبير بيشدنى لأنه منهج إدارى ناجح فى بيئة العمل وناجح كمان فى الحياة، المبدأ ده هو Leave The Dance Floor & Get a Fresh Perspective From The Balcony.

وده معناه بالبلدى كده إنك فى خضم الأحداث اللى حواليك اللى أنت منغمس فيها اطلع وبُص عليها من فوق- من البلكونة، هتشوف حاجات مش باينة وأنت واقف على الأرض، هتشوف التفاصيل والصورة الكبيرة الشاملة، وهتخرج بَرّه المحيط اللى حواليك لما هو أبعد وهتلاقى حلول بسرعة تزقك لقدام.

لما بتطلع البلكونة بتشوف وجهات نظر متعددة وخيوط بتربط تفاصيل ببعض وهتشوف بشكل أوضح أنت عايز إيه وتبدأ ترسم المسار اللى ممكن يوصلك له.

واحنا واقفين فى البلكونة باصّين من فوق بنشوف أنماط الناس وتصرفاتها وتصرفاتنا معاهم، لما بنطلع فوق الأحداث بنلاحظ أمور عن نفسنا أحيانًا قبل ما نلاحظ حاجات عن غيرنا، زى أخطاءنا ونقاط ضعفنا أو قوتنا.

البلكونة بتخلينا نبص بنظرة فيها شمولية واستعراض للأمور بشكل مرتب فيه: أحداث، ناس، مواقف، سلوكيات، وأفعال وردود أفعال.. وده كله بيوصّلنا لحلول خارج الصندوق.

 من البلكونة بتشوف نفسك فين من اللى حواليك، بتعرف موقعك من المحيطين، وهل أنت ماشى ولّا وقفت مكانك ولّا رجعت ورا، وده كله حصل ليه وإزاى وإمتى وممكن تعمل إيه علشان يحصل تغيير إيجابى سريع؟.

فى أمثلة حقيقة بيّنت لنا أن عدم التكيُّف السريع مع التغيرات بتبقى نتائجه الفشل الحتمى، مثال على ده فى الشغل هو شركة كوداك، الشركة المهيمنة على التصوير الفوتغرافى لعقود طويلة، كانت بطيئة فى التكيُّف مع التصوير الرقمى وخسرت منصبها الريادى فى هذا المجال وغالبًا مطلعوش البلكونة ومشافوش الموضوع من فوق.

أكبر مثال على نجاح التكيُّف السريع وأخد قرارات سريعة إيجابية هو تكيُّفنا احنا فى ظل الكورونا وازاى عرفنا نتعامل مع العمل أو التعليم من المنزل، التكيُّف كان السبيل الوحيد للاستمرار والتأقلم.

نهايته: البلكونة مكان عالى- فيه أنت واقف أعلى من مستوى التفاصيل والحكايات والقصص، شايف الصورة الكبيرة وفاهم وعارف تربط أطراف الخيوط سوا وتربط النقط علشان تشوف صورة أقل ضبابية وأكثر شفافية وقبل كل شىء فى البلكونة أنت قادر تبُص لقدام.

اطلعوا البلكونة، شمّوا هَوَا وشوفوا الصورة وانتم مش جوّة بروازها، وشوفوا نفسكم من منظور أعلى من سطح الأرض.