جوزك على ما تعوديه.. لما تنزلى مع جوزك تعملى شوبينج البيت

أنا بتكلم هنا عن شوبينج خاص بمستلزمات البيت الشهرية.

وده بيبقى عبارة عن شراء لاحتياجات البيت من أكل وشرب، وده غالبًا بيكون كل شهر، طبعًا هو دايمًا فى إشارة إلى إنك مُسرفة سواء روحتى السوبر ماركت أو طلبتى أون لاين أو عملتى أى حاجة.. وده بيتضح وبيظهر دايمًا لمّا مصروف البيت يخلص قبل ما الشهر يبدأ من الأساس.

لكن لما تشاء الظروف والأقدار ويقرّر ينزل معاكى السوبر ماركت الحال بيتغير وبيبتدى هو عينه تزوع على حاجات هايفة ومش ضمن احتياجات الشهر، وده طبعًا بيأثر أكيد على المصروف.

تلاقيه رايح لجانب احنا مش بنعدى من ناحيته أصلاً فى السوبر ماركت وهو الكورن فليكس المستورد، وبعدها يتجه للجبن ويبتدى يتذوق أغلب الأنواع اللى عند الراجل اللى غالبًا بتكون مستوردة ومُحَرّم أساسًا دخولها البيت، وبعدها ينطلق بقى ناحية المقرمشات والمشروبات الفوارة ويبتدى يجيب أشكال وأنواع.

الفكرة مش فى المصروف نهائى؛ الفكرة فى تبريراته للأشياء دى، وإصراره عليها.. والعجيب فى الأمر أنه بيستغرب جدًا من الفاتورة اللى فى الآخر بتطلع مناسبه جدًا لمليونير فى منتصف العمر.

علشان كده الأفضل والأنسب إنهم ميجوش معانا السوبر ماركت ونكتفى بالسمعة اللى طالعة علينا إننا مبذرين أحسن ما ندخل السجن جميعًا ومحدش يربّى العيال.