جوزك على ما تعوديه.. قفص الزوجية

الراجل مش المفروض يكون محبوس فى قفص والمفروض يتمتع بالحرية الكاملة فى حياته بعد الزواج، موضوع القفص ده سمعناه كتير جدا من أهالينا زمان، بس فى نفس الوقت مش طبيعى بردو إنى أتجوز وأكون لوحدى علشان هو يتمتع بحريته وميكونش محبوس فى القفص.

المعادلة صعبة جدا، إنك تبقى زوجة فرفوشة وتحافظى على بيتك وكمان متشيليش انتى كل المسئوليات بحجة إنك تديه حريته.

الزوجة الذكية لازم تعمل خطة علشان تدير حياتها بنجاح، فى مواقف كتيرة ممكن تتجاوزى عنها فى سبيل تحصلى على حياة سعيدة وكمان مشاركة فى المسئوليات.

يعنى مثلا سبيه بخرج براحته وممكن كمان يسافر يوم ينفس فيه عن نفسه مع أصحابه، سبيه يفصل ويرجع لك تانى وساعتها يقدر يسعدك ويشيل عنك. 

ابعدى عن البوز اللى بعد خروجة أصحابه، سستمى نفسك إنه فى يوم ممكن يبقى فيه بيفصل فيه مع أصحابه.

بلاش تكلميه كتير أول لما يخرج، ولا وهو بيلعب بلايستيشن، بلاش تبقى سبب فى خسارته فى الماتش وقلش أصحابه عليه بقية اليوم.

اعملى سيستم يريحك ويخليكى مبسوطة

 وافصلى يوم واخرجى فيه مع أصحابك، انتى كمان لازم تفصلى علشان تقدرى تستوعبيه، وساعتها هو حيقدر جدا إنك سيباه براحته فا حيعمل كل مجهوده إنه يحسسك بنفس الشعور.

الراجل مش بيحب يكون فى قفص الزوجية، بس احنا ممكن نعمل له بوكس صغير ونسيبه فيه براحته وبكده نبقى لعبناها صح.