جوزك على ما تعوديه.. إنتى اتغيرتى

جملة معناها كبير جدا بيقولها. الزوج فى الخناقة حتى ولو ممكن الخناقة تعدى من غيرها، وعلى فكرة آه اتغيرت! ما أنت كمان اتغيرت.

كل الناس بتتغير، محدش بيثبت على حاله، والتغير بيختلف إذا كان إيجابيًا أو سلبيًا، بس الأكيد إن كلنا بنتغير.

أقصد هنا التغير فى الفهم والتعامل مع الأمور وليس التغير فى الطباع، محدش بيتغير فى موضوع الطباع ده. 

المهم إن التغير ممكن يكون إيجابى فى التعاملات اليومية مع المشاكل والمواقف والواحد مبيتعلمش ببلاش.

بس أهم حاجة إن التغير ميطولش المشاعر لأنها المولد الحقيقى لكهربة المنزل غير كده الدنيا بتضلم.

يعنى إن الواحد يتغير فى ردود فعله تجاه المواقف وارد، لأننا بنكبر وبنكتسب خبرة من الحياة، لكن المشكلة إنه يقول إنك اتغيرتى من ناحيته وإن مشاعرك فيها تغيير، دى بتبقى مشكلة كبيرة، لأن الست من طبيعتها إنها صبورة وحمولة وبتحب جوزها جدا وبتشوفه بطل، فإن حصل تغير فى مشاعرها وجوزها يقول ده فكده معناها مشكله كبيرة.

ومن ناحية تانية فى أزواج كتيرة بتتلكك فى الموضوع ده وكل شوية تقول لها انتى اتغيرتى وهى لا بتكون اتغيرت ولا حاجة غاية ما هناك بس إن فى مليون حاجة فى دماغها لازم تخلصهم قبل ما الأسبوع يخلص. 

سواء فى البيت، ولا مع الأولاد، ولا فى شغلها ومشاكله، ده مسموش تغير ده اسمه شيل الهم ودول بيفرقوا كتير.

فاصبر عليها وبلاش أسطوانة انتى اتغيرتى دى، بدل ما تتغير عليك وساعتها لا تلوم إلا نفسك.