جوزك على ما تعوديه.. إنتى فين من تفكيره؟
رغدة أبورجب
طبعا إنتى موجودة بس بحدود، يعنى بيفكر فى مستقبله وشغله والبلايستيشن والكورة وعربية أحلامه وموتوسيكل أحلامه، ومصاريفه وأقساطه والعيال والأكسلايه بتاعته، أكله، أصحابه وكمان مرة أصحابه وخروجاته .
فى حتة كده صغيرة بتشملك إنتى والعيال ومصاريفهم ومذاكرتهم وخروجات الويك إند اللى بينزلها غصب معاكم وهو ده المكان اللى فاضى عنده، وده بعد محاولات كتيرة. وبجد هى دى تركيبة دماغه فالمطلوب من حضرتك تستمتعى وترضى بيها.
أما بقى تفاصيل حياتك اليومية وتفاصيل العيال دى بتكون موجودة كخلفية فى شريط حياته.
طبعا الموضوع ده بيختلف من شخص إلى آخر بس غالبا ما بيكون دى تركيبة أغلب الرجال المهم إنى هنا بطمنك متزعلوش لو هو مش مركز معاكى وإنتى والعيال دى مش مشكلتك إنتى أبدا، دى مشكله دماغ الرجال فاستفيدى من المكان المخصص وحاولى تحصلى على المزيد لو قدرتى.
.. المشكلة مش فينا خالص وتركيبة دماغه كده.
