سرحان عبدالبصير
منى رضوان
سرحان عبدالبصير هو الشاب الطيب الخجول الليّ مثله عادل إمام فى المسرحية الشهيرة « شاهد ما شافش حاجة».
فى المسرحية من حيث لا يعلم بيتورط سرحان فى قضية لما جارته الراقصة عنايات أبو سنة بتتقتل فى بيتها الليّ هو فى نفس عمارة سرحان.
شخصية سرحان كما جسدها المؤلف هى شاب طيب أوى وغلبان لدرجة السذاجة بيشتغل ممثل فى برنامج أطفال اسمه هيا بنا نلعب، بيلعب سرحان دور الأرنب سفروت الليّ شخصيته شبه سرحان نفسه.
لما بتتقتل عنايات بتكشف التحريات أن سرحان هو آخر واحد شافها فبيعتبروه شاهد فى القضية اللى هو ماشافش فيها حاجة ومن هنا جاء اسم المسرحية.
سرحان قبل حادثة قتل جارته كان «واحد» وبعدها تحول لواحد «تاني».
تحول سرحان من واحد طيب أوى بيقضى وقته من الشغل للبيت لحديقة الحيوان الليّ بيزورها كتير يأكل فيها الأرانب لشخص جديد، شخصيته بتتخبط وتتحول بعد ما بيعيش تجربة التحقيق معاه ويتعلم أن الحياة بيعيش فيها الأسود مش الأرانب.
التويست فى القصة هو أن الظابط الليّ حقق معاه « المقدم أحمد عبدالسلام» كان مش مصدق سذاجة شخصيته وعفويتها وكان شاكك فيه وكان تصوره أنه بيعمل ده كجزء من الهروب من قتل المجنى عليها وأن الشخصية دى ما هى إلا تغطية على جريمته.
تحولت شخصية سرحان المهزوزة المنعزلة عن الحياة الاجتماعية لواحد بيحاول يبقى مخربش وواخد الدنيا بالدراع.
كره سرحان الشخصية الفطرية بتاعته لأنها طيبة وهو شاف إن الطيبة دى عيب لازم يخلص منه.
على قد ما سرحان ورانا طيبته وصلته لإيه على قد ما أغفل أن شخصيته الطيبة دى فيها حاجات كتير جميلة، لام سرحان نفسه على شىء هو فى الأصل طيب وصالح...لام نفسه على بساطتها.
فى المشهد فى المحكمة والقاضى بيحقق معاه قال: «هم تلات مطارح اللى باروحهم، البيت والتليفزيون (مقر عمله) وجنينة الحيوانات، للبيت تانى، ما بشلش ساعة، إحساسى بالوقت معدوم، مشاكل العصر بتاعتكم دى مابتهمنيش ».
من حب سرحان للأرانب والأطفال تحول تماماً ليصبح معارفه سلومة الأقرع.
هل سرحان عنده مشكلة فى الثقة فى النفس؟ جايز بس الأكيد إن فطرته وبساطته خلته مبيعرفش يكدب ولا ينافق بس دخل فى صراع بين سرحان الطيب وسرحان المخربش الليّ حاول يبقاه بس فى الآخر انتصرت الطهارة والبساطة فى شخصيته ورجع سرحان يقدم برامج الأطفال تانى ورجعت حياته إلى ما كانت عليه.
لو كنت مكان سرحان ومريت بتجربة صادمة زى الليّ مر بيها كنت هتعمل إيه؟ هتحب تفضل زى ما أنت وتعدى عليك التجربة ولا هتتغير وتاخد درس العمر؟
فى الحياة بنتعلم بالصدمات.. بل هل الصدمات قادرة إنها تغيرنا وتشقلبنا ولا هتفضل طبيعتنا الطيبة زى ما هى؟
