جوزك على ما تعوديه..للطبطبة فن وأصول

الطبطبة والدلع ده أسلوب حياة بيتميز بيه أخواتنا السوريات واللبنانيات، بتحاول الست المصرية منافستهم بس غالبا ما تبوء بالفشل، لأسباب كثيرة جدا يطول شرحها.

المهم هنا أن الراجل المصرى أول ما بيسمع شو، يأبورنى بيرفرف على طول، وده سلاح قوى جدا بتتميز بيه أخواتنا فى بلاد الشام.

وطبعا لو حاولنا نقلد الأخوات حيبقى حوار ماسخ أوى عامل زى الناس اللى بتقلد الماركات العالمية وتغير فيها حرف أو كده..

المشكلة كبيرة جدا على فكرة بس إحنا ممكن نحاول السيطرة عليها، الستات المصريات فى الدلع جامدين بس نديهم فرصتهم. 

دايما بيقولوا أن الرجل المصرى ده مفيش زيه، الحقيقة إنه مفيش زيه علشان بيدلع.

الراجل ممكن يعمل أى حاجة فى مقابل أنه يشعر أنه مدلع وسيد قراره، الفكرة أن نتيجة الظروف بيبقى الراجل والست أمام بعض فى كثير من المواقف وبيبقى فى نوع من الندية وساعتها بتنسى الست أن معاها أقوى سلاح ممكن تنهى بيه المعركة فى ثانية واحدة وهو الدلع.

لكن من كتر انغماس الستات فى الحياة العملية فقدوا ونسيوا سلاحهم الأساسى مما أدى إلى ضعف قدراتهم على الإقناع.

أهم حاجة أنه يحس أنه على أولوية اهتماماتك، وأنه رقم واحد فى حياتك حتى قبل الولاد، ده حيساعد كتير فى حل أغلب المشاكل.

الدلع والطبطبة حل سحرى لجميع المشاكل وبيجيب من الآخر، وكمان بدل ما يروح يدور عليه بره وتبقى مشكلة كبيرة.