مراد سالم
![](/UserFiles/News/2024/06/01/61297.jpg?240602100000)
منى رضوان
مراد سالم رجل أعمال عنده مصنع نسيج وارثه عن عيلته، راح زيارة لإسكندرية وقابل عايدة ووقع فى حبها، عايدة بنت وزير سابق، جميلة ومن عيلة فمراد بيقرر يتجوزها وبيحصل.. وبعد ما تتجوزه بتكتشف عايدة من خطيبة مراد السابقة أنها الزوجة رقم 13 لمراد وأن مراد شاب تلفان فسدان متعدد العلاقات.
بعد معرفة عايدة بتقرر تعيد تربية مراد وتهذيبه بحيلة قديمة كانت بتعملها وهى طفلة.خدعته وأوهمته أنها بيجيلها صدمة عصبية لو حد حاول يصحيها وإنها بتحاول تنتحر لما ده بيحصل وبياكل مراد الطُعم وتبدأ عايدة فى إعداد خطة تلقنه منها درس عمره ما هينساه.. بتتعرف من خطيبته على زوجاته السابقات وبيشتغلوه كلهم مع عايدة.
فى فيلم الزوجة 13 بنشوف معالجة كوميدية لراجل متعدد العلاقات، مراته الأخيرة بتسيب أصل القصة وهى أنه خدعها ومكانش أمين معاها وتقرر أنها تفوت كل ده وأنها عايزة تديله عبرة وتّقوم سلوكه وتتعامل مع الموقف بذكاء وحيلة ودى حاجة فى الواقع مستحيلة من وجهة نظرى.
الفيلم يعيد للأذهان قصة ألف ليلة وليلة وقصة شهرزاد وشهريار من التراث، فيها بنشوف شهرزاد (مرادف لشخصية مراد) بيتجوز عروسة كل ليلة ومع مطلع الفجر يأمر بقطع رأسها بس لما قابل شهرزاد (مرادف لشخصية عايدة) الليّ بتحكى له كل يوم حكاية ومع مطلع الفجر تتوقف وتقوله نكمل بكرة وكل ليلة تكسب يوم زيادة تعيش فيه وتعوده على وجودها.
الفيلم كوميدى من الطراز الأول بس فى ثناياه بيتكلم عن موضوع محتاج قدرة رهيبة للتحكم فى النفس تخلى واحدة تبقى عارفة أن حبيبها متعدد العلاقات بشكل رهيب زى مراد ومع ذلك تعرف تسيطر على مشاعرها وتدخل فى صراع نفسى كبير لتقويم اعوجاج من تحب، ومش بس كده، دى تفضل تحبه ومينزلش من نظرها حتى بعد معرفتها خداعه الشديد لها.
الفيلم جسد شخصية مراد سالم الليّ تصرفاته طفولية إلى حد كبير بكل ما فيها من رغبة فى التملك والاستحواذ وجسد عايدة من خلال الزوجة المحبة الليّ عندها كرامة ودهاء إيجابى خلالها تعرف تجيب حقها بشكل ما من مراد الليّ أخفى عليها أمورا هى من حقها تعرفها.
كلنا عارفين الفيلم ده وحافظين منه مقاطع كتيرة، كلنا بنضحك لما نشوفه ومهما اتعاد لا نمل من إعادة مشاهدته ولكن لو بصينا للقصة نلاقيها مرعبة ومفيهاش أى كوميديا.. الفيلم باختصار فيه مثال واضح لحياة متعددى العلاقات من الرجال وما يفعلوه لستات لا ذنب لهن.. هل كل الستات لو اتحطت فى الموقف هتبقى زى عايدة؟ أشك جدًا ولكن بالتأكيد مراد سالم الذى اضحكنا فى الفيلم لم يكن أمينًا بالمرة وجاتله عايدة لتعطيه درس العمر.. بس يا ترى هل أشباه مراد من الرجال فهموا الدرس؟.