جوزك على ما تعوديه.. ريموتك فى إيدك

فرق كبير جدا بين حياة العزوبية والحياة الزوجية، أنا هنا بتكلم عن الرجل وليس عن المرأة

أيام العزوبية هو ملك نفسه، كل قراراته من دماغه، هو المتحكم الرئيسي فى حياته، باختصار ريموته فى إيده بس بعد ما بيمضى على قسيمة الجواز الدنيا بتختلف تماما، وبيصبح مسئول عن أهم شريك له فى الحياة 

المسئولية هنا ليست مسئولية مادية فقط، دى يمكن أقلهم.

حياتك بتختلف نهائيا تفاصيلك مش ملكك لوحدك، هى شريكة معاك فى اختيار أغلب الأشياء، رأيها ضرورى فى كل المواضيع سواء بسيطة أو كبيرة.

حياتك اللى كانت على طول مع أصحابك وضعها بيتغير، ودى طبيعة المرحلة، ما هو مش طبيعى تكون سايبها طول اليوم الصبح فى الشغل وبليل مع أصحابك، ما هى مش قطعة ديكور فى البيت ولا إيه!؟ 

أنا مش بكرهك فى الارتباط، بالعكس أنا بشرح لك أن الحياة بتختلف علشان متتفجأش ويأثر ده على حياتك بعدها.

العزوبية جميلة مفيش خلاف عليها بس الجواز والمشاركة أجمل وأحلى.

وجود شخص آخر بتشاركه كل تفاصيلك وبتهتم بتفاصيله بيكون إحساس جميل. 

لكن فى الحقيقة دى بتكون نقلة كبيرة بتحصل فى حياتك وبتحتاج لوقت كبير علشان تستوعبها ولأن التحول بيكون صعب بس مش مستحيل 

بنات الناس مش لعبة.