جوزك على ما تعوديه.. ويقول لك الراجل المصرى مفيش أسهل منه؟!
رغدة أبورجب
بعد خبرتى البسيطة فى مجال الحياة الزوجية وكتابة مقالات جوزك على ما تعوديه فى بعض الحاجات كده ممكن أديها كنوع من أنواع النصايح للتعايش مع الرجل فى سلام.
يعنى مثلا هو كائن غير مهتم بالتواريخ نهائيًا، يعنى صعب على ذاكرته إنه يحفظ تاريخ أول يوم شوفتوا بعض، وتاريخ الخطوبة، وتاريخ الفرح والفلانتين وعيد ميلادك، فاكبرى دماغك من موضوع النهارده مش بيفكرك بحاجة، لانه مش هيفتكره.
هو مش بياخد باله لا من قصة شعرك ولا من لونه ولا حتى من شكله.
فامتسأليهوش إيه مش واخد بالك من شعرى، لأنه ببساطة حيقول لك جميل، فا متطلبيش أكتر من كده.
وطبعا مش محتاجة أقول لك إنه مش حيقدر يفيدك فى اختيارات اللبس اللى بتمتحنيه فيه لأن ببساطة الألوان بالنسبة له يا أبيض يا أحمر يا أسود وأصفر ده بالكتير، أما باقى الألون اللى هو بيبى بلو وروز بونبون والكلام ده بالنسبة له خيال علمى!
ذوقه فى اختيار الهدايا غريب شوية مش دايما بيكون موفق فى اختيار الهدية المناسبة، طبعا ده فى حالة إنه افتكر المناسبة من الأساس.
بيحب الأكل جدًا وبيهتم بيه وبتفاصيله، بيحب الجمال جدا جدا وبيقدره عند أى حد.. فا اعملى نفسك مش شايفة. بيحب خروجة يوم الخميس والقاعدة مع أصحابه على القهوة، طبعا مش محتاجة أفكرك إنه مش بيحب نوعية الأسئلة بتاعت انت فين ورايح فين ولا جى إمتى؟
كل ده ويقول لك الراجل مفيش أسهل منه، أمال لو صعب كنا عملنا إيه؟
