جوزك على ما تعوديه.. حافظى على جوزك

هو المفروض إن السّت تحافظ على جوزها، ده اللى دائمًا بنسمعه من أمهاتنا وبنشوفه فى أغلب المسلسلات، وكأن الرجل ده ممكن يتّاخد منها عادى وهى ماشية فى الشارع..

طيب إحنا حنحافظ عليه وحنعامله معاملة الآثار النادرة، الفكره بقى هو حيعمل إيه؟؟! 

حيحافظ على نفسه ويحترم مراته وعياله ولاّ عينه حتبقى على اللى رايحه وجاية؟.

الفكرة إن فى رجالة كتير بتحب تستكشف وتخوض التجربة والسّت اللى فى البيت المفروض تلم وراه وتاخد بالها منه علشان تحافظ عليه وتربّى العيال وتحافظ على البيت.

ليه فكرة إننا نحافظ عليه وهو مش بيحافظ علينا؟!، طيب ما هو سهل بردو إن السّت تبص بَرّه بيتها وتدوّر على الكلام الحلو لو جوزها مش بيقول لها الكلام ده.

الفكرة إللى أنا عاوزة أقولها إننا لازم ناخد بالنا من بعض وزى ما السّت حتحافظ على جوزها لازم الراجل كمان يحافظ على السّت وتتراعى ويتقال لها كلام حلو وتاخذ حقها تمام؛ لأنها لو أهملت ممكن للأسف تدوّر على الاهتمام ده بَرّه وساعتها حتكون مشكلة كبيرة. 

لأن رد فعل جوزها مش حيكون زى رد فعلها فى نفس الموقف، وفكرة النزوة وأزمة منتصف العمر والكلام الكبير اللى بيتقال للسّت فى مثل هذه الأزمات حيبقى غير مُجدى له.

وبالنسبة للرجل اللى بيلطف كتير بَرّه البيت مَرّة من المَرّات الدنيا حتتشقلب عليك وربنا ما يوريك زوجة عرفت إن جوزها بيخونها.

امشى جنب الحيط أحسن.