جوزك على ما تعوديه.. عايزين زيادة فى مصروف البيت

لازم تعرفوا إنكم متجوزين بنى آدمين مش عفاريت ولا سحرة

حضرتك شايف وعارف ومتأكد من زيادة كل السلع، حتى لو مش بتنزل شخصيًا تشترى أكيد بتسمع فى التليفزيون أو بتسمع من أصحابك أو بتشوف حتى الكوميكس على الفيس بوك.

ليه بقى فى اعتقاد أن مصروف البيت ده ربنا مبارك فى صحته وعافيته وحيقضى الشهر من غير زيادة بالرغم من الزيادة الكبيرة والمبالغة فى كل الأسعار.

وتلاقى كلام من لازم توفروا ولازم تشدوا الحزام والست الواعية والست الشاطرة وكلام من هذا القبيل.

حضرتك أنت كده عاوز عفريتة مش ست واعية ده مستوى تانى خالص 

الموضوع بسيط جدا نظرًا لارتفاع الأسعار لا بد من ارتفاع مصروف البيت ليتناسب مع زيادة الأسعار، حتقول لى مش حقدر ازود حقول لك تمام اتصرف أنت.

العب يا عفريت وحل المعضلة الحسابية دى وليك عليا لو نجحت لتمسك المصروف على طول وكمان ممكن تمسك المصاريف الموسمية زى مصاريف المصيف واللبس الصيفى والشتوى فى نفس ذات الوقت. 

وربنا يبارك فى صحتك وعلاج الضغط عليا متحملش هم.

أما بقى لو وافقت على الزيادة واستسلمت للأمر الواقع ممكن نمسكه إحنا مفيش مشكلة كل إنسان بيغلط وساعات كتيرة بيفتكر أنه ممكن يعمل المعجزات، ده إحنا بنتشقلب علشان مصروف البيت يوصل لنص الشهر وساعة ما بيلمس فى آخر الشهر بنصلى ركعتين شكر لله.

جرب علشان تعرف.