جوزك على ما تعوديه.. الغيرة من غير سبب
رغدة أبورجب
الست دائمًا بتحب الراجل الواثق فى نفسه واللى عارف كويس قيمته وقيمة شريكة حياته. الرجل التقيل مش أى حاجة تحرك مشاعره وغيرته عليها، كل شىء بالمعقول حتى الغيرة.
ده مش معناه إنها مش بتحب غيرته عليها، أبدًا، دى مشاعر صحية جدًا للعلاقة، بس الاعتدال فيها صحى جدًا ومفيد للطرفين طبعًا دى معادلة صعبة جدًا وممكن تكون غير مفهومة لبعض الرجال.
الست دائما بتحب الراجل اللى مش كل حاجة بتكلمى مين ومين ده وهاتى موبايلك أشوفه والكلام المريب ده، الست بتحب تشعر أنها مصدر ثقة مش موضع استجواب.
الغيرة الزائدة على الحد بتنقلب بشكل عكسى وبتقلب بمرض يؤدى إلى مشاكل كبيرة بين الزوجين.
والعكس أيضًا يؤدى إلى نفس المشاكل الكبيرة بين الزوجين، هذه المشاكل بتبدأ من عدم المبالاة من الزوج بأى من شئون الزوجة وعدم الاهتمام بتفاصيلها وده بيحسسها إنها غير موجودة، أنا عارفة إنك ممكن دلوقتى تقول أيوه يعنى أغير عليها ولا لأ؟ حقول لك هى معادلة صعبة ما بين الغيرة المعقولة والإفراط فيها، لأن الستات مش بتحب الإفراط فى مشاعر الغيرة لأنها بتحس بعد شويه إن زوجها مش واثق فى نفسه وسرعان ما بيغير على أى تفصيلة حتى ولو بسيطة.
فالتحكم فى مشاعر الغيرة والسيطرة على انفعالاتك يعزز من ثقتها وحبها فيك، بس دائمًا مركز معاها ومع تفاصيلها وممكن تعبر عن غيرتك لو استدعى الأمر وده شىء حتتقبله هى على طول لأنها فاهمة إن ده مش العادى وإنها أكيد تخطت الحدود اللى أنتم متفقين عليها.
خير الأمور الوسط.
