جوزك على ما تعوديه.. العيد فرحة

كل سنة وأنتم طيبين يا رب عيد سعيد علينا كلنا، أيوه زى ما سمعت علينا كلنا إحنا كمان من حقنا نعييد معاكم ونخرج ونحتفل.

الخروج مش حكر عليكم أنتم فقط ولا خروجة يوم الوقفة مكتوبة فى القاموس باسم الرجال فقط. يعنى إحنا كمان ممكن نخرج فى الوقفة وعاوزين نخرج وننبسط فى العيد. 

وطبعا مش محتاجة أفكركم أن المطبخ مقفول طيلة أيام العيد وعلى المتضرر اللجوء إلى مطاعم الشارع لأن دخولكم المطبخ مرفوض شكلاً وموضوعًا بسبب الجرم اللى بيحدث فور دخولكم المطبخ، علشان كده المطبخ مقفول لبعد العيد.

نرجع بقى لموضوع العيد والفرحة وكده، الخروج مش معناه إننا نروح نزور الست الوالده ونقضى عندها اليوم وحضرتك تدخل تنام وأنا أقعد بالعيال وست الحبايب، أبدا ده مش معناه إننا خرجنا واتفسحنا.

فاعمل حسابك على الخروج والفسح فى العيد علشان إحنا داخلين على امتحانات ومذاكرة وأيام صعبة أوى. إجازة سعيدة علينا جميعا ننعم بها بالراحة والهدوء وراحة البال وأهم حاجة ننعم بيها..إغلاق المطبخ.