جوزك على ما تعوديه.. السحور على مين

الإجابة معروفة أن السحور على الست طبعا، بس فى حالات ممكن يكون السحور على الراجل خاصة لو إنها بتصحى بدرى علشان مدرسة الولاد فا بيكون صعب عليها أنها تحضر السحور بليل ممكن يروح عليها نومة عادى.

حقيقى اليوم بيكون طويل وفيه كمية تفاصيل من توصيل المدارس، للشغل لتحضير الفطار ومن بعدها فقرة الطلبات التى لا تنتهى ناهيك عن التمارين ولا كأننا بنصنع أبطال عالم، ثم أخيرا فقرة السحور.

فا من هنا نحب نقول أن لو مش عاوز تتسحر وتسحر أحباب الله براحتك بس حقيقى الطريق للمطبخ ميتوهش، وممكن تستعين بجوجل لو مش عارف طريقه.

صدقنى إحنا عارفين مصلحتك أكتر وبكده كمان تكون شاركت فى سحور صايم وأخدت ثواب، وفى نفس اللحظة أخدت ثواب فى إنك ريحت الست اللى شقيانة معاكم من أول رمضان.

ولو كنت بتعتمد عليها من أول رمضان فى تحضير السحور آن الأوان بقى إنك تتغير، وتقوم تجيب لنفسك المية قبل الأذان، ما هو أنت مش قادر تقوم من السرير وهى مش قادرة بردو تتحرك.

تقسيم الأعمال هو السر عزيزى الرجل فى ظل الظروف الراهنة، خلى الفطار علينا والسحور عليك وصدقنى أنت الكسبان.