خطرفة صيام (3)
منى رضوان
رمضان شهر فضيل تحلو معه العزومات ولمة العيلة على الفطار والسحور، بس مع إن هم وجبتين ومواعيدهم ثابتة لكن فيه معاهم شىء قاسى، ألا وهو غسيل المواعين أو ما أطلقت عليه لعنة المواعين ودى أوحش من لعنة الفراعنة.
ملاحظاتى فى الموضوع ده:
1 - المواعين حاجة لا تفنى- بتفضل تزيد وتكبر ولو مقررتش توقف غسيل المواعين اليوم هيفرط منك وكل خططك هتبوظ.
2 - لا تؤجل عمل اليوم إلى الغد هو مبدأ مواعينى أصيل علشان هتلاقى 10 اضعاف الحاجة فشيل عن نفسك بدرى بدرى وخلص إلليّ وراك.
3 - جملة يا رب المواعين تموت دى مش جملة من فراغ، ده دعاء الواحد بيدعوا بيه ربنا وبيقوله فى ساعة استجابة.
4 - مقدار حبك لحد ممكن يقاس بغسيلك لمواعينه كنوع من التقدير له، الليّ بيحب حد ميجيبلوش ورد أو هدية - لأ يغسل مواعينه ويورينا همته مع الأطباق والصوانى والكوبايات والملاعق والشوك والسكاكين ويأخدهم فومين غسيل والصابون والكريمات عليا من أفخر وأحسن الأنواع كمان.
5 -غسيل المواعين حدث مرضى لأنه نتيجته المباشرة آلام فى الظهر والركبة وبوشان فى أطراف الأصابع وخشونة وقشف فى اليدين.
6 - أعتقد والله أعلم أول من أضرب عن الطعام كان حد عنده عيال وأسرة كبيرة فتسببت المواعين فى إنه عاش فى عزلة عن عيلته لأنه مكفى طول اليوم على الحوض فجتله فكرة الإضراب عن الطعام لايقاف سيل غسيل المواعين الى مبيخلصش.
7 - بعد التجربة الحياتية مع المواعين الواحد فهم بعض الجمل إلى مكانتش مفهومة عنده: خلص الليّ فى طبقك أو الليّ فى الحلة علشان أغسلها،مش قادرة اخرج ورايا مواعين أو متحطش الأطباق فى الحوض وهى فيها أكل أو أرمى الليّ فى الطبق علشان الحوض ميتسدش أو أنت هتوسخ طبق تانى ليه .
8 - لبس جوانتى وأنت بتغسل المواعين ده شيء فاشل ومبنعرفش نمسك أى حاجة بيهم كويس فبتتزحلق ولو عرفنا نمسكها كويس بتاخد وقت أطول بكتير. وكذلك غسالة الأطباق فاشلة لأن لازم تستنى تملاها بحاجات محتاجة غسيل وقبل كدة تشطف كل حاجة كويس قبل ما ترصها فيها دة غير كمان أنها بتستهلك مية كتير وكمان مش بيتغسل فيها كل حاجة فوفروا تمن الجونتيات وغسالة الأطباق وهاتوا بدالهم كريمات لليدين ومهدئات.
9 - كل المواعين زى بعض، لعينة!
10 - غسيـل الـمواعين دليل على وجود استراتيجية الـ short term أو الـlong term planning.
اللى من مدرسة الشورت تيرم دول بيصبّنوا حاجة حاجة ويشطفوا حاجة حاجة ويحطوها فى مكانها، اللونج تيرم بيصّبن كل حاجة وبعدين يشطف كل حاجة مرة واحدة.
المهم أسيبكم دلوقتى علشان عندى شوية مواعين محتاجة أخلصهم قبل ما هم اللـّ يخلصوا عليا.
