خطرفة صيام (1)
منى رضوان
رمضان ابتدَى كل سَنة وأنتم طيبين، وبمناسبة حلول الشهر الفضيل أحب أفكركم ببعض النقاط المهمة:
- لازم كلنا نعمل سوفت وير update لنفسنا وننزّل أحدث إصدار لرمضان 2023 اللى فيه تحديثات مهمة زى: بدل أى كلمة مش لطيفة هنقول اللهم إنى صائم/ صائمة، ولو قلنا اللهم إنى صائم وشتمنا فى سرّنا يبقى برضه شتمنا، فلازم نصفّى النية ونفوّت لبعض على قد ما نقدر.
- من 1 رمضان لـ 30 رمضان ممكن نستخدم جملة «شوفوا أى يوم ونفطر أو نتسحّر فيه سوا»، وده بغض النظر هنعمل كده ولاّ لأ.
- تجنبوا الناس إلى بتشرب قهوة أو سجاير أول ما تفتح عينيها، دول عندهم كام يوم فى الأول هيبقوا صعبين أوى وهيبقوا مضغوطين فأبعدوا عنهم أحسن. - رمضان شهر روحانيات، وكده فمبدئيًا كل الناس بتبقى عارفة ميعاد صلاة الفجر والمغرب بالدقيقة والثانية.
- رمضان والمسلسلات: يا ريت يا جماعة نركز فى المسلسلات الإيجابية أرجوكم، عايزين رومانسيات مش إدمان وخيانة وغدر، عايزين نعيش فى دنيا الأحلام شوية، متسوّدوهاش فى وشّنا من مجاميعه.
- أول يوم شغل فى رمضان لو رحت المكتب وشفت ناس جديدة معاك متقلقش، دول زميلاتك بس من غير make up.
- لمّا حد يقولك صحّينى على الفطار يبقى صحّينى على الفطار - يا ريت محدش يجّود من عنده ويصحيه بدرى نص ساعة، بتقلب خناقة.
- لو معزوم عند حد وعايز تجيب معاك حاجة حلوة يا ريت تفتكر إن الكنافة بالنيوتيلا والرد ڤلڤت دى بدعة، فياريت نرجع للجذور ونجيب كنافة بورمة وبسبوسة عادية من اللى عارفينها دى.
- جملة صايم ولا زى كل سَنة دى بطلت من السبعينيات، التجديد مطلوب يا ريت.
- إلى السّت المصرية الأصيلة: علشان متفطريش فى رمضان وتقدرى تتعاملى مع تكشيرة الراجل المصرى الأصيل يا ريت متتفرّجيش على أى مسلسلات تركى لحد العيد.
- كل المصريين بلا استثناء بيتحوّلوا لمايكل شوماخر قبل الفطار وهم بيسوقوا والشوارع بتبقى مضمار الفورميلا وان فخُدلك ساتر.
- المشمش فى رمضان اسمه قمر الدين، والمكسرات اسمها ياميش وشنطة رمضان اسمها Ramadan Bag.
- شهر رمضان هو الشهر الوحيد إللى السّت المصرية بتستعمل فيه النيش، بتطلع منه طقم الخشاف فيا ريت تتصوَّروا سِلفى معاه لأنه قطعة أثرية مهمة بتستعمل من السَّنة للسَّنة.
- طقم الشوربة والخُشاف حاجة واحدة على فكرة.
- أى حد هيسأل أى حد على أى حاجة هتتعمل إمتى؛ الإجابة الصحيحة هى: بعد رمضان.
- فى رمضان مفيش أى حاجة فى الدنيا تستاهل إنك تفطر شوربة وسَلطة وتتسحَّر زبادى لايت وثمرة فاكهة.
- أشهَر سؤال فى رمضان: هتفطرونا إيه النهارده؟.
- محدّش فى أول رمضان يبعت لحد يقوله سامحنى قبل رمضان- سامحناكم قبل كده ولسّه زى ما انتوا.
