جوزك على ما تعوديه.. أيها الرجال.. إحنا كمان بنصوم

رمضان الأسبوع اللى جاى والجَو حَرّر والدنيا صيام وكله على آخره..

سواء من ارتفاع الأسعار ولّا البنزين ولّا الامتحانات اللى حتعَيّد علينا بعد العيد مباشرة.. يعنى كله مش مستحمل.. 

فياريت برّاحة شوية علينا يا عم الحج، حضرتك صايم فى شهر كريم وثوابه عظيم، فا لو سمحت خذ بالك أننا كستات بنصوم معاك بردو، اه والله وبيبقى علينا مجهود أكبر فى الطبيخ ومدارس العيال ومذاكرتهم وكل التفاصيل البسيطة اللى انت مش بتشوفها من الأساس.

فا لو فى يوم ممكن تساعد فى تحضير الفطار وتنوب عن الست اللى طلعان عينها كل يوم يبقى كلك ذوق وكمان تاخد ثواب إفطار صايم.

يوم تانى تقرر إنك تساعد فى توصيل أحباب الله إلى المدرسة وتاخد ثواب العلم يبقى كتر خيرك.

يوم تانى تقول محدش يطلب أى طلب من ماما علشان هى مثلاً مثلاً بنى آدمة وتَعبانة ومن حقها ترتاح وتاخد ثواب الرفق بالزوجة ويبقى عدّاك العيب..  كل ده إن شاء الله فى ميزان حسناتك. 

فكرة إننا ناخد بالنا من بعض ونطبطب على بعض دى حاجة مهمة. 

بجد مش تحيز بس الستات بيتعبوا جدًا فى الصيام والوقفة فى المطبخ لمدة طويلة وفى درجات حرارة مرتفعة جدًا.

أنا عارفة إن الزوج بيتعب فى الشغل بس بيرجع ينام لوقت المغرب، عكس المسكينة اللى بترجع من الشغل على المطبخ.

الرحمة مطلوبة أحيانًا.. وبعدين خلى عندك نظرة عميقة بُص للعيد ما أنت لو خفيت شوية فى الطلبات الست هتعيش معاك للعيد أمّا لو العكس مش حتكمل معاك أصلاً للعيد.