جوزك على ما تعوديه.. خروجة يتيمة
رغدة أبورجب
طبعًا معروف أن يوم الخميس بيبقى خروجنا الأصحاب وقعدة القهوة بتاعت الرجل، أما الست فغالبا مش بيكون عندها يوم للخروج وده لأن أغلب أصحابها بيكونوا نفس الظروف الصعبة بتاعت البيت والعيال والمذاكرة وبيصعب جدا عليهم توضيب أى خروجة وده نظرًا للالتزامات الكتيرة اللى بتكون وراهم، عكس الرجل اللى بيقفل الباب وينزل يوم امتحان الدراسات عادى.
فلو حصل واتفقوا على خروجة بيكون إعجاز علمى وبيكون احتفال وزغاريط وكده.
وطبعًا لازم يوم خروجة الزوجة كل الطلبات والمشاوير تبقى واجبة.
ويبقى نظام الحقوا دى ماما سيباكم وخارجة.
نعم سيباكوا إيه؟ ده أنا صبح وليل معاكم لما يبقى يوم واحد أخرج فيه، يبقى ماما سيباكم، طيب بالنسبة لبابا اللى بنشوفه فى المناسبات والأعياد القومية، نعمل معاه إيه؟
وتلاقى العيال بتعيط وبتتشحتف وإنتى نازلة ولا كأنك رايحة العراق!
وتلاقى الزوج بيبص لك نظرات غريبة وكلام الله يسهله وانبسطى ويتكّ على السين، فى إيه؟ هو مش حضرتك بتنزل كل أسبوع برده ولا إيه؟ هى الكحكة فى إيد اليتيم عجبة!
وطبعًا ناهيكم عن كم التليفونات اللى تلاحق الست وقت الخروج وكلها تليفونات غير مهمة بالمرة؟ مثلا العيال جعانة فين العيش؟ هما المفروض يناموا إمتى؟ هى الجبنة فين؟
طبعًا دى أسئلة معروف إجابتها لكل أعضاء البيت ممكن كمان عم محمد البواب يبقى عارف إجابتها لأن صوتى بيبقى جايب العمارة كلها وقت النوم.
سيبونا نشم نفسنا علشان نعرف نواصل، حبة هوا وحنرجع تانى مش حنطفش راجعين للمدرسة والمذاكرة والدراسات والأكل.
ادونا ساعتين بس نفصل فيهم فى الخروجة اليتيمة.
ارحمونا يرحمكم ربنا.
