جوزك على ما تعوديه.. فى التأنّى السلامة

خدى الراجل اللى يكون موجود معاكى فى المواقف الصعبة اللى مش محتاجة تدوَّرى عليه؛ لأنه على طول موجود.

الدنيا صعبة ومواقفها أصعب وبتعلم علينا، فا فكرة مواجهتها لوحدك ممكن تخليكى هشة وضعيفة وقابلة للكسر.

اختارى صح.. فكرى فى شريك بيتحمّل المسئولية.

والمسئولية هنا بتكون فى المواقف الصعبة واتخاذ القرارات والتصدى للمشاكل والوقوف على حلها.

أمّا نوعية الشباب بتاع الحب زادنا وعش العصفورة يكفينا وكلام الأشعار الجميل ده ميأكلش عيش حاف.

ده حتى الكلام الجميل ده مش بينجح فى الأفلام علشان ينجح فى الواقع المرير اللى بنعيشه فى الدنيا، محدش قال إن الفلوس أهم حاجة، نهائى عُمْر الفلوس ما كانت أهم حاجة بس فى مستوى معين أو حد أدنى لا بُد من توفره حتى تنجح أو تتسم الحياة بالنجاح.

وفى نفس الوقت ميبقاش الاختيار خاطئ نظرًا لتوفر الفلوس، الاختيار بيكون فى اختيار الشخصية ومدى الانسجام بين الطرفين ثم المستوى الاجتماعى والمادى للأسرة بحيث يكون متقاربًا من أسرة العروسة منعًا للمشاكل فى المستقبل.

الفكرت إنك متنخدعيش ورا الكلام المعسول وحلاوة البدايات واختارى شريك حياتك بوعى وحكمة بعيدًا عن أى مؤثرات.

وحُطى فى دماغك أن قراراتك اللى هتاخديها أثناء اختيارك هتدفعى تمنها بعدين، فا أرجوكى فى التأنى السلامة وفى العَجلة الندامة، والندامة مش ليكى لوحدك لا نهائى ليكى ولعيالك وللمجتمع كله بيلبس.

فا بلاش جَوّ التسرع ده علشان لهفة الفستان الأبيض وطلى بالأبيض طلى وهوب نلاقيكى طالة بالأسود فى المحاكم.

اختاروا صح وخدوا فرصتكم للآخر مفيش داعى نهائى للتسرع محدش بيجرى وراكم.