جوزك على ما تعوديه..الشبكة بكام
رغدة أبورجب
الشبكة دى بتكون عبارة عن هدية بيقدمها العريس للعروس وقت الخطبة، وبتختلف فى شكلها من أسرة إلى أخرى من ذهب إلى ألماظ حسب رغبة العروس وإمكانيات العريس
مع أنها بتكون عبارة عن هدية إلا أن سعرها فى كثير من الأحيان بيكون متفق عليه بين الأسرتين، وفى بعض الأحيان بتكون مجال للخناق أو أحيانا لفشل الزيجة بأكملها
وطبعا الموضوع ده زاد جدًا فى ظل ارتفاع أسعار الذهب عالميا، وأصبحت الشبكة البعبع الكبير بالنسبه لأى شاب بيفكر فى الجواز
أما من ناحية العروس فا فكرة الشبكة بتكون بالنسبة لها حلم الطفولة زى حلم لبس الفستان الأبيض.
علشان نوصل لحل يرضى جميع الأطراف لازم ننزل إلى أرض الواقع ونشوف أقل شبكة أصبح سعرها كام؟ وهل هى فى مقدورة الشاب اللى فى مقتبل العمر وعاوز يتجوز
طيب وهل العروس عندها القدرة على الاستغناء عن أشياء مهمة فى مقابل الشبكة؟ طيب نعمل إيه علشان نحل الأزمة اعتقد أن فكرة الزواج مش من أساسياتها الشبكة وأن ممكن أن تتغاضى العروس عن شبكة بملايين فى مقابل حاجات مهمة فى الزواج أو فى توضيب الشقة. لو فعلا العريس محترم ومناسب متخليش التابوهات تعيشكم فى ديون بلا أى سبب.
الشبكة دى هدية وقيمتها المادية مش تعبير عن الحب ولا التقدير.
فرفقا بطالبى الزواج.
