الديسكتوب

الديسكتوب أو ما يعرف بسطح المكتب هى المنطقة اللى بنشوفها أول ما بنفتح الكمبيوتر ويظهر لنا برنامج التشغيل Windows وهو بالفعل زى سطح المكتب لأنه بمثابة سطح لشغلنا وأى برامج أو مجلدات بتظهر كلها عليه.

كل البرامج اللى بنستعملها بتبقى فى شريط المهام الجانبى أو السفلى أو فى الأدوات الذكية وحتى زرار «ابدأ» اللى بنستخدمه للوصول إلى البرامج والمجلدات وإعدادات الكمبيوتر بيكون على الديسكتوب.

مما سبق واضح أن سطح المكتب ده حاجة مهمة ومؤثرة وعليه حاجات كتير، منها ما هو ظاهر أو مستخبى وبنحتاج ترتيبه بشكل مستمر.

ومن هنا نجد أن فيه تشابه كبير بين سطح المكتب وحياتنا.

أولًا: ببساطة سطح المكتب اللى على الكومبيوتر بعد وقت ما بيكون زحمة وعليه أيقونات كتير فى العدد مع أننا فى الواقع مش شرط نكون بنستعملها كلها، المتعارف عليه إننا كمستخدمين بنحتاج عدد قليل منها لإنجاز شغلنا- زى حياتنا فيها ناس داخلة وناس خارجة ومعارف ودواير كتير بس لما نحتاج لسند فى موقف ما بنلاحظ أن الناس الليّ لازم تبقى معانا مش شرط تكون هى معانا، عدم وجودهم معانا بيفرض سؤال: هل الناس دى إضافة فى حياتنا؟

ثانيًا: الأيقونات الكتيرة الموجودة على سطح المكتب بتاخد مكان كبير، بس بنسيبها علشان احتمال فى يوم نحتاجها- زى بعض العلاقات فى الحياة، بتاخد مكان ووقت ومشاعر ومبتديناش مقابل بس بنخاف نتخلص منها ونبترها تحسبًا أن يكون لها لازمة بعدين.

ثالثًا: كل الأيقونات والبرامج على سطح المكتب أو الديسكتوب بتاخد سعة تخزينية على جهاز الكومبيوتر وتشغل مساحة تقاس بالجيجا بايت أو الميجا بايت وفى الآخر الجهاز كله له سعة ثابتة فلما بنسيب حاجات مش محتاجينها بنهدر مساحة ممكن نستخدمها فى شىء هنحتاجه، هو ده الوضع حرفيًا فى الحياة، بنملاها بناس أو حاجات مش مهمين بياخدوا مكان وحيز ناس مهمة، بنسكن ناس غلط بدل الناس الصح فى حياتنا.

رابعًا: الديسكتوب هو أول حاجة بنشوفها لما نفتح الكومبيوتر، كل ما كان منظم وواضح كل ما كان مريح لعنينا ونظرنا وده نفس فكرة تنظيم حياتنا والناس جواها فنعرف نتعامل معاهم ازاى وتكون علاقتنا مبنية على القيمة المضافة للطرفين.

خامسًا: عملية تنظيم الديسكتوب لازم تكون حاجة متكررة، مش شىء عرضى بنعملها مرة لما الديسكتوب يتزحم، والحياة كدة برضه بنحتاج كل فترة لوقفة مع النفس وإعادة ترتيب الأوراق والأشخاص، مش لازم نستنى تحصل كارثة أو صدمة تفوقنا فنقف ونعيد ترتيب الناس والاولويات- على العكس دى حاجة لازم تتعمل بشكل دورى وواعى من غير ما يحصل موقف طارئ.

الديسكتوب والحياة وجهان لعملة واحدة مع فارق أن الديسكتوب جماد والحياة ليست كذلك - أما آن الأوان أن ننظم حياتنا كما ننظم سطح مكتبنا؟