الخميس 28 مارس 2024
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

جوزك على ما تعوديه.. إن غاب القط العب يا فار

طبعا مش محتاجة أقول مين القط ومين الفار، تلاقى الست رايحة تزور والدتها أو والدها يومين علشان مش لاحقة تشوفهم وتطمن عليهم، وماشية وعندها إحساس بتأنيب الضمير وتلاقى الزوج بيودعها والدموع فى عينه، وبمجرد ما تقفل الباب تتلقق عينه والفرح والمرح يسيطروا عليه وحالة الانتعاش والفرحة تسود المنطقة، وتبتدى ثورة التليفونات لتظبيط الخروجات والتجميعات.



وطبعا ناهيك بقى عن صوت الضحك والصخب، وكأن يا ولداه مكتوب على الست النكد والوحدة.

أول لما تقرر تخرج عند أهلها يبدأ الزوج فى عزومة أصحابه عنده فى البيت وكأن الاحتلال زال. 

ومن ناحية أخرى بتكون هى حاملة هم أكله وشربه وينتابها إحساس رهيب بتأنيب الضمير، أما هو فبيكون بيفكر إزاى حيحتفل من غيرها.

وطبعًا بيكون بيودعها وكأنها مهاجرة مش رايحة يومين وراجعة وفى باطن الأمر بيرقص من جوا وكأنها بتعذبه فى جوانتانمو مش متجوزاه مع إنه هو اللى كان بيجرى وراها علشان ترضى تكلمه مش تتجوزه.

الفكرة بقى إن بعد يومين يبتدى يسألها أنتى جايه إمتى، وفعلاً بيبقى عاوزها ترجع هو بس بيكون عاوز استراحة ويحس إنه مش مرتبط أو مسئول عن أى شىء وإنه ممكن يقرر يعمل أى حاجة ويعملها على طول من غير ما يضطر يسأل ويبرر وحاجات كتيرة. ولكن بعد الفسحة والأكل والضحك بيبقى عاوز الروتين والنظام مرة تانية.

المهم يا ستات متنخدعوش بدموع التماسيح بتاعت الوداع كلهم بيكونوا بيرقصوا من الفرحة وبيستنوا الفرصة دى بفارغ الصبر.