الرسالة التى غيرت حياتى

«لحظة واحدة من الزمن» أو One Moment in Time هى أغنية متفردة ورائعة للمغنية الأمريكية ويتنى هيوستن افتتحت بها دورة الألعاب الأولمبية سنة 1988 فى سيول.

الأغنية حققت نجاحًا باهرًا واتباع منها آلاف النسخ.

أنا أعتقد أن الأغنية تتعدى كونها أغنية تحفيزية فى مناسبة رياضية عالمية - الأغنية بتتكلم عن لحظة فارقة وفاصلة بتظهر فيها فرصة بتغير حياتنا.

لما سمعت الأغنية زمان تأملت فكرتها وتساءلت: هل اللحظة دى حقيقة ولا ده كلام أغاني؟ هل فعلًا هى دى الفرصة اللي بتمنحها لنا الحياة؟ 

محمد منير قال: الفرصة بنت جميلة راكبة عجلة ببدال.. العاقل لو يلحقها يتبدل بيه الحال - يا ترى هى دى الفرص ذات اللحظات الفاصلة؟

هل فى حياتنا لحظات بنعمل فيها اختيارات بعضها فارق وممكن يغير حياتنا؟ 

أعتقد أيوة، زى لحظة قمنا فيها باختيار حر- أى اختيار، ممكن رسالة تبدأ علاقة حلوة أو تنهى علاقة مؤذية أو تفتح باب رزق أو ترجعنا للطريق الصحيح. 

أو ممكن تكون الفرصة هى الشجاعة إنك ترد على رسالة أو حتى تعمل مكالمة أو ترد على نمرة غريبة.

بعد سنوات طويلة جدًا برجع للفكرة اللي طرحتها الأغنيتين دول بوجهة نظر ناضجة بعد ما بقيت متأكدة أن فى لحظات بتغير الحياة وتأخذها فى اتجاه آخر.

لحظات بتكتشف فيها أمور عن ذاتك أو غيرك، أو تحضر موقف أو تعرف حد أو تقدم على تجربة جديدة تخرجك من جلدك. عندى صديقة أعرفها كما أعرف نفسى - اللحظة الفارقة فى حياتها كانت رسالة غيرت حياتها.

هتقولى رسالة؟ أيوه رسالة محددة النص والمضمون والعنوان.

رسالة اتبعتت ولم تكن تعرف ما وراءها - كل اللي عرفته ساعتها إنها لازم تتبعت - باختصار حياتها أخدت منعطفًا آخر بسبب رسالة بعتتها فى لحظة اختيار.

الفكرة إننا مش بنكون عارفين نتائج اختياراتنا والفرص اللي قدامنا، بنحاول قد المستطاع أن نتايجها تكون إيجابية بس مع كل اختيار بيكون فى خوف لكن فى the one moment in time لو تهيأت الظروف إننا نتجاوز الخوف وناخد مخاطرة هنا ممكن تكون الفرصة اللي بيتبدل بيها الحال.

قالت لى صديقتى أن فى اللحظة اللي بعتت فيها الرسالة تأكدت أنها كدة عملت اللي لازم تعمله - دورها انتهى لما أخدت الخطوة أول ما شعرت أنها اللحظة الصح.

نهايته: اللحظات والفرص الفارقة كتير - بس الخوف بيفرمل الناس من أنهم يعملوا اللي المفروض يعملوه. وتظل أصعب حاجتين فى الدنيا، الصبر على انتظار اللحظة المناسبة ويليها الشجاعة لاقتناصها - بس مهما كانوا صعبين هما أفضل كتير من أن اللحظة تعدينا أو نفوتها.

فى رسائل بنبعتها فى الدنيا ممكن توصل وممكن متوصلش - بس قبل ما نعرف هى وصلت ولا لأ علينا الأول إننا نبعتها.