مطلوب عروسة

مطلوب عروسة مسلسل كوميدى فرقع فرقعة كبيرة لما اتعرض سنة 1990، كان 12 حلقة بتدور حوالين اتنين أصحاب بيدوروا على عروسة وكل واحد له مواصفات معينة.

العريس الأول كان يونس شلبى وده كان عالم ومدرس جامعى ومواصفات عروسته تتلخص فى أنها لازم تكون «عقلية علمية معملية فذة».

العريس التانى كان أحمد بدير وده طلباته زى ما قال فى التتر «مطلوب عروسة على المقاس عنيها خضرا بشعر أصفر متكونش وش بهدلة». 

باختصار واحد بيدور على العقل والتانى على الشكل، المسلسل لطيف وكنا نضحك على الطلبات العجيبة دى ونقول إيه الأوڤر ده وأنه أكيد علشان تمثيل العملية وسعت من المؤلف.

بس بعد ما كبرنا والحياة وريتنا مواقف كتير اتأكدنا أن الطلبات إلىّ كانت فى المسلسل من العريس مكانتش من فراغ، خصوصًا العريس إلىّ مركز على الشكل، ده طلع طلباته معقولة مقارنة بما نراه ونسمعه.

خد عندك يا سيدى طلبات من بعض السادة الرجال:

- تحديد الطول والوزن ولو الشعر وستايل اللبس، وكمان فى رجالة بتحدد عدد اللغات إلى بتتكلمها العروسة وهو يكون أقرع وبكرش اتنين متر لقدام وبيتكلم عربى بالعافية.

- تحديد أنها تكون آنسة أو مدام أو مطلقة أو أرملة، وفى كمان يقولك تقبل التعدد، وفى نفس ذات الوقت هو يكون متجوز مرتين تلاتة ومتمرمط فى المحاكم ومعاملته وحشة وياخد الجايزة العالمية لجلنف العام وكل عام.

- تحديد إنها متخلفش لأن هو عنده ولاد أو إنها لو خلفت يكون ولد أو إنها لو مخلفة ميبقوش ولادها معاها، بيطلب كده وهو ماشى بأورطة عيال وبيشترط إنه هيجيبهم يعيشوا معاها.

- تحديد إنها تكون ست بيت هايلة ولهلوبة وبتطبخ وتغسل وتنظف وتكون بتشتغل وتشارك فى مصاريف البيت.. مش فاهمة الصراحة انت عايز تتجوز ويبقى معاك ونيس ولا عايز واحدة تأكلك وتشربك وتصرف عليك؟

- تحديد أنها لا تزيد عن سن كذا (غالبًا لو هو 50 سنة بيتكلم فى أن سن العروسة يكون من 22 ال 25 مثلا)، بيشرط شرط زى ده وهو مكحكح وشكله يخلفها مستريح.

فى كل ما سبق اكتر ما يدهشنى البجاحة يا جدع.. إيه انت رايح تشترى تلاجة ولا بوتجاز؟ ولا تكونش فاكر نفسك هتفصل العروسة عند الترزى بتاعك علشان تبقى على المقاس وزى ما أنت عايز بالضبط.

إيه كم التفاهة دى؟ وطالما تفاهة بتفاهة بقى يبقى المفروض العروسة تختار هى كمان: العريس ميقرّعش وميشخرش وهو نايم وميعجزش ووشه ميكرمش وميتخنش وميخسش وميعياش وتفضل صحته بشوكها بلا أى مضاعفات وكمان ميفتقرش وفلوسه تزيد.. ونسيت أهم حاجة أنه ميصدرش أى أصوات أو روائح كريهة.

أقول للرجالة من النوع ده بلا وكسة وارفع القبعة للسادة الرجال اللىّ مبيفكروش كده وأقولهم عاش.