قراءة حديثة لبدائع الزهور فى وقائع الدهور حكاية عصمة الدنيا والدين أم خليل "الحلقة الأولى"
رحلة مع ابن إياس الحنفى يرويها: إيهاب البدوى
كانت أنفاسى تتقطع وأنا أجرى داخل حارة برجوان عقب منتصف الليل بعشر دقائق كاملة يطاردنى ثلاثة من الجنود المماليك وسط الحارة المعتمة التى أغلق الكل عليه بابه وحتى ضوء المشعل الوحيد الذى وضع أعلى بوابة الحارة غير قادر على إنارة دروب وعطف الحارة.
كان ما يدهشنى كيف انتقلت عبر الزمن بهذه الطريقة وتحول المخبر اللى كبس على القهوة إلى عسكرى مملوكى.
أيقنت أننى قد قاربت على الوقوع فى أيديهم خاصة وأن أنفاسى تقطعت ووقفت أمام أحد الأبواب الخشبية ألهث، وسرعان ما فتح الباب ويد من داخلها تسحبنى وتعيد إغلاق الباب بمزلاج خشبى.
وصاحب الدار ينظر من مشربية الدار متحسبًا حتى ابتعد الجند.
التفت إلىّ وأنا ألهث وقال:
عطشان؟
أيوه
مد يده إلى إبريق من النحاس المطعم وأكواب من فضة مشغولة وملأ لى الكوب مياه بالورد تجرعته مرة واحدة بنهم.
وبدأت أنظر حولى شيخ فى الخامسة والستين من العمر خط الشيب معظم لحيته بشوش الوجه وتطلعت حولى فى المنزل مجموعة من الطنافس للجلوس وسجادة يدوية وجلسة مرتفعة قليلا بها أربع شلت ومكتب أرابيسك معشق عليه مجموعة أوراق ومحبرة وريشة كتابة، بينما السقف مرتفع وشمعة مشعلة داخل فانوس زجاجى من الحجم المتوسط.
سألنى: كانوا بيجروا وراك ليه عسكر المماليك؟
والله معرفش أنا كنت قاعد على القهوة فى أمان الله بشرب حلبة حصى وحجرين معسل الساعة جت اتناشر بالليل كل حاجة اتغيرت حتى القهوة والحارة والناس الزمن غير الزمن يا..
هو اسم الكريم إيه ولا مؤاخذة ؟
- معقول لا تعرفنى يا بنى!
والختمة الشريفة ما أعرفك ياعم الحاج.
ابتسم الرجل ابتسامة ماكرة وقال:
- ألست أنت ابن عبد العظيم البدوى؟!
جفلت وأنا أنطق بصعوبة وقد جف حلقى:
أيوه عرفت منين؟!
- أنا يافتى أعرف كل المسافرين عبر الزمان دقق جيدًا ألم نلتق مرة فى سويقة اللالا أو بركة الرطلى أو فى موكب السلطان قلاوون الكبير
الصراحة مش واخد باللى برضه مين سيادتك
- أنا يافتى ابن إياس الحنفى
قول والمصحف!
-لا أحلف بغير الله
تصدق يا حاج محمد يا ابن إياس أنا بدور عليك من ساعة أن بدأت أمارس هواية السياحة عبر الزمن أصل الأستاذ جمال الغيطانى حببنى فيك من كتر الكتابة عنك
- عليه رحمة الله فقد كان صديقى
لكن يافتى وهل ينفع برضه أن تسير عبر الزمان بهذه الملابس
قلت له مالها الهدوم كوتشى أديداس وبنطلون جينز أمريكانى وجاكت جلد من إتش أند إم
- إى إتش وأى إم يا فتى أنت تعرض نفسك لخطر الافتضاح لا بد أن تناسب ملابسك ملابس العصر الذى ستذهب إليه
تصدق عندك حق أنا عندى جلابية إماراتى حكاية أجيبها المرة الجاية
- لا تحمل هم الملابس فعندى فى الخزانة ملابس تلائمك
وما هذه القطعة من الجلد الذى تحملها فى يدك؟
فضلة خيرك شنطة ديلسى أصلى فيها شوية ورق دشت وكان فيها كمبيوتر بس بيتصلح فى المول اللى جنب السراج
- هل أجد لديك محبرة فقد انتهى الحبر وأريد تدوين أحداث اليوم فى كتابى بدائع الزهور فى وقائع الدهور
لا والله يامعلم بس معايا قلم فرنساوى ممكن يمشى
- قلم بدون محبرة ليس له داعى يا فتى
جرب بس ياعم الحاج وخد رزمة ورق دشت اكتب فيها
جلس إلى المكتب وبدأ يستخدم القلم الفرنساوى وذهل عندما رأى القلم يكتب دون الحاجة إلى غمسه فى الحبر
- أنقذتنى يافتى أنا أدون حكاية شجرة الدر
وأريدك أن تذهب معى للقائها
دعوة كريمة بس بصراحة ماقولتش لمراتى إنى هبات بره
- ما هذا يا فتى أى زوجة تلك التى تستأذنها؟
مراتى ياعم إياس
- أسألك الزوجة رقم كام؟!
ربنا يحظك يا حاج محمد هى واحدة
- ما هذا الزمن العجيب ليس لديك إلا زوجة واحدة ولا جوارى ولا ما ملكت يمينك!
إيدى على كتفك يا حاج محمد بس بلاش جواز عشان خاطر العيال
ممكن جوارى معندكش حاجة قطعية هيفا وهبى أو البت روبى
- غدا يا فتى ننزل سوق الجوارى وانتقِ ما شئت
قلت بصوت عالٍ: على حسابك طبعا يا بركة
- لقيت الرجل يرد بفرحة: لو قلمين فرنساوى كمان ورزمة دشت تبقى رحمتنى وكل طلباتك مجابة
يا سلام جيت فى جمل دستة أقلام وورق دشت كمان
إحنا عندنا كام ابن إياس
أنا هروح مراتى زمانها رافعة أبووردة وهجيلك بكرة
تانى يوم وعلى قهوة حارة برجوان كان القهوجى يضع أمامى السحلب بالفواكه ثم يغير حجر الشيشة وأنا تقريبا الشخص الوحيد الذى يجلس خارج القهوة فى هذا الجو البارد
طلعت عشرين جنيه وحاسبت القهوجى
ماتخلى ياباشا
معلش ممكن أمشى أى لحظة ومش عايز اتعبك
الساعة الثانية عشرة ودقيقة بدأت عملية السفر عبر الزمن ووجدت نفسى أطرق باب ابن إياس
فتح لى خادم حبشى سألته: سيدك ابن إياس فين؟
إنه فى المنصورة ياسيدى
بيعمل إيه فى نصاص الليالى هناك؟
لا أعلم لكن وصله استدعاء من السلطانة شجرة الدر فخرج على عجل
طب ما تعرفش أوصل لموقف البيجو من هنا إزاى؟
وما هو البيجو يا سيدى؟
قصدى حاجة أركبها أروح بيها المنصورة
ممكن تؤجر بغلة من العربخانة
سمعت صوت يصدر من داخل البيت دعه يدخل يا ريحان أغا
دخلت إلى المنزل وجدت جارية فائقة الجمال
أهلا بك يا سيدى ألست ابن البدوى
أيوه أنا يا قمر عرفتى منين
كنا نتكلم عنك كثيرا أنا وسيدى ابن إياس وأنك دائم الزيارة بعد منتصف الليل لكنك غبت فترة طويلة
معلش بقى الشغل يا.. القمر اسمه ايه
ضحكت وهى تقول بدلال: اسمى ياسمين
والله ريحتك باينة
ممكن تدخل لتستريح يا سيدى حتى الصباح لندبر لك ركوبة إلى المنصورة
والله فكرة أنا أساسًا مرهق من المشوار وممكن بكرة لو ميكروباص لبنها وأنا أكمل
حسنا يا ريحان أغا اصطحب ابن البدوى إلى الحمام وأنا أعد له العشاء
صوتى ارتفع وأنا أقول إيه يا حاجة أنت فاكرانى إيه ريحان مين اللى يجهز الحمام
لا تقلق يا سيدى إنه أغا
أغا على نفسه ماتيجى تحضرى أنت الحمام ونبعت نجيب بيتزا ديلفرى
للأسف يا سيدى لا يمكن فى عدم وجود سيدى ابن إياس
جتنا نيلة فى حظنا الهباب خلاص هنام من غير حُما
فى الصباح الباكر استيقظت على صوت ياسمين وهى تمسح بيدها على وجهى
صباح الخير يا سيدى
صباح القشطة
اغسل وجهك وتعالى لتناول الفطور
نزلت إلى الساحة أتناول الإفطار وسألت ياسمين: هو إيه اللى خلى ابن إياس يسافر المنصورة؟
اقتربت منى جدا وهمست غالبًا هناك حدث جلل
قربى أكتر والنبى أصل سمعى تقيل
ضحكت بدلال وشفتاها تلتصقان بأذنى:
الفرنجة نزلوا المنصورة ويقال إنهم استولوا على دمياط وأنباء عن وفاة الملك الصالح نجم الدين أيوب
ابتعدت ياسمين وأنا يكاد يغمى عليا وسألتها:
يعنى مافيش أمل تدعكيلى ضهرى قبل ما أروح للمنصورة
ضحكت بدلال وقالت: فرسك جاهز بالخارج يا سيدى وتقدمت منى وطبعت قبلة على خدى وقالت بدلال: هستناك لما ترجع من المنصورة
مشيت وأنا ألعن ابن إياس طوال الطريق حتى وصلت ميدان أم كلثوم فى المنصورة ورحت أبحث فى المقاهى المنتشرة حتى وجدت ابن إياس بيصطبح على قهوة عجورة الذى ما أن رآنى حتى قال:
طالت غيبتك يا ابن البدوى قولت هستأذن مراتى وأرجع وبقالك شهرين غايب
معلش يا زعيم الصيف كله قضيته فى الساحل
ساحل الغلال أم ساحل روض الفرج؟
لأ فضلة خيرك الساحل الشمالى
قوللى هو فيه إيه
اقترب منى وقال: السلطان الصالح نجم الدين أيوب مات والسلطانة شجرة الدر أخفت خبر وفاته لأن الفرنجة استولوا على دمياط وفى طريقهم للمنصورة تعالى معى
على فين؟
سنلتقى السلطانة فى قصر جديلة
عارفها جديلة وتوريل الواحد كان بيشاور للميكروباص بعلامة النصر بس بالجانب
وما هو الميكروباص يا ابن البدوى؟
حاجة زى الكارتة كده
طب هلم بنا
دخلنا قصر جديلة واستقبلنا الطواشية بترحاب كبير ودخلنا إلى مجلس السلطانة
ما هذا الجمال الربانى إنها سيدة تقارب الخمسين من العمر شديدة البياض شعرها الأصفر المجدول وعيناها الخضراوان مع مسحة الحزن تعطيك انطباعًا أنك أمام صوفيا لورين الله يرحمها
ملت على ابن إياس وهمست: دى السلطانة صاروخ أرض جو دى شكلها بنت 18
زغدنى ابن إياس تأدب يا ابن البدوى فسكت
كانت السلطانة تجلس على كرسى العرش وحولها وقوف الأمير بيبرس البندقدارى والأمير أقطاى مش رشدى أباظة ولا المليجى طبعا لكنها كانت تسمع وجهة نظرهما ثم قالت:
لقد أرسلت رسولاً إلى حصن الكرك أطلب حضور توران شاه ابن زوجى السلطان ليتسلم القيادة فى معركتنا مع الفرنجة وأرجو أن يظل الخدم يحملون الطعام والشراب يوميا إلى جناح السلطان حتى لا يعرف أحد أنه فارق الحياة.
قال الأمير أقطاى: سمعا وطاعة يا سلطانة ثم سأل: هل يعرف أحد من قائد جيوش الفرنجة؟
قلت بشكل عفوى: لويس التاسع
اتجهت العيون إلىَّ وقال ابن إياس إنه ابن البدوى مساعدى فى التدوين
تقدمت منى السلطانة وقالت: ماذا تعرف عنه يا ابن البدوى؟
بنفس العفوية قلت: ابن البدوى طالعة من بقك شربات يا جناب السلطانة ثم استجمعت نفسى وتنحنحت
لى بعض العيون والبصاصين هناك يا مولاتى أخبرونى أن اسمه لويس التاسع وأنه شبه الفنان أيمن الشيوى ما هو من المنصورة قالت: لكن أهل المنصورة يتميزون بالسمرة الجميلة واللون القمحى
رددت قائلاً: بعد الحملة الفرنسية هيبقوا ملونين يا سيدتى وعنيهم خضرة وشعرهم أصفر
ومن أين أنت يا ابن البدوى؟
دكرنس شارع المتاجر يا جناب السلطانة
هل تستطيع أن تتسلل إلى معسكر الأعداء وتعرف لنا ماذا يدور هناك سآمرهم أن يعدو لك حصانًا سريعًا
مش لازم يا مولاتى هاخد بيجو من الموقف
وصلت إلى أشمون الرمان وجلست على مصطبة أمام إحدى دور المدينة مع بعض الشباب
أحدهم قال لى: منور يا بركة
تسلم يا شقيق إيه النظام؟
السلطانة بعتانى أعرف إيه اللى بيحصل
ولا حاجة هنتحرك فى الليل ونعبر إلى معسكر الفرنجة المواجه لنا وسنحاول أن نعرف الأخبار
سألتهم: هتعرفوا إزاى ودول بيتكلموا فرنساوى؟
رد أحد الشباب ما تقلقش ياعم الحاج واخدين معانا إبراهيم الأخرس
ده إيه مدرس فرنساوى؟
بنقولك الأخرس لسانه اتقطع وهو صغير بس عيل لبلب وهيشوف إيه اللى بيحصل ويجى يحكيه بلغة الإشارة لشلبى ابن أخته وشلبى يترجم لينا ونعرف كل حاجة
أنا اطمنت على مصر الصراحة
اتغدينا شبار أخضر مبطرخ ورز ومصينا قصب على ميزانية أشمون
وعلى المغربية نزل ست شباب ومعاهم الشوقروف ومعاهم إبراهيم الأخرس وشلبى المترجم بتاعه فى البحر الصغير وعبروه إلى معسكر الأعداء
على نص الليل الشباب رجعوا والشقارف بتاعتهم مليانة دم
عرفت أن كل واحد جز راسين من روس الفرنجة اللى كان يهمنى إبراهيم الأخرس اللى لف داخل معسكر الفرنجة وشلبى المترجم اللى قال:
إبراهيم سمعهم إنهم بيرتبوا للهجوم على جديلة يوم الجمعة بعد الصلاة
أنت متأكد يا شلبى أن إبراهيم سمع كويس
عيب عليك يا ابن البدوى
يبقى لازم أتحرك فورا وأذهب إلى المنصورة وأبلغ السلطانة
استنى أوقفلك توكتوك من على الميزانية
وصلت المنصورة السادسة صباحا ووجدت السلطانة تستقبلنى بالترحاب
حمد لله إلى السلامة يا ابن البدوى شكلك مرهق ووضعت يدها على جبهتى
تقولش حطت حتة قشطة على مربى ساقعة على وشى
قلت لها: تسلمى يا مولاتى
أخبرنى ماذا سمعت؟
الفرنجة يستعدون لمهاجمة جديلة الجمعة القادمة بعد الصلاة
هل أنت متأكد من مصدرك يا ابن البدوى؟
عيب يا مولاتى مصدر ثقة
وهل تضمن ألا يتحدث وينقل الخبر للفرنجة أننا عرفنا الخطة
اطمئنى يا مولاتى لسانه مقطوع
وجدت السلطانة تمسك يدى بيديها وكهرباء تسرى فى جسدى ومنتظر تاخدنى فى حضنها وأنا كنت هعيط ساعتها
لكنها اكتفت بالضغط على يدى دليل على الامتنان وقالت: يالك من رجل شجاع قطعت لسانه حتى لا يفشى السر
أنت متعرفنيش يا مولاتى أنا معنديش رحمة
نادت السلطانة شجرة الدر:
أرسلوا فى طلب أقطاى وبيبرس
وأنت يا ابن البدوى اصعد لتأخذ حماما وتغير ثيابك وتنضم إلينا
نادت يا مسك
دخل عبد حبشى
خد ابن البدوى للحمام
بصيت لمسك قلت لها:
لأ مش عايز والنبى يا مولاتى ماليش نفس
اذهب يا ابنى البدوى
قلت لها: حاضر وطلعت وأنا ساكت
بعدها بنص ساعة
دخلت القاعة على ابن إياس الذى كان يجلس وحده فى انتظار السلطانة وما إن رأنى وأنا أدخل حتى استلقى على قفاه من الضحك مالك يا ابن إياس شفت إسماعيل ياسين داخل عليك ولا حاجة
لا يا أخى لكننى أحاول تخيلك وأنت تدخل الحمام ومعك مسك!
والنبى ما تفكرنى يا ابن إياس أحسن بطنى بتقلب وببقى عايز لا مؤاخذة أستفرغ أنا أقنعت مسك بالعافية إنه ما يدخلش معايا الحمام ومن ساعتها وهو زعلان
ثم قلت بصوت مرتفع: نفسى أعرف مين اللى قال لعظمة السلطانة إنى عايز مسك يدعكلى ضهرى
دخلت السلطانة فى تلك اللحظة ومعها بيبرس وأقطاى وأشارت ضاحكة إلى فارس الدين أقطاى قائلة: هو من قال لى أن أكافئك بالعبد مسك
قلت فى عقل باللى: يا ابن الصرمة يا أقطاى ودينى لأوريك
انتبهت على صوت السلطانة وهى تقول: اسرد عليهم ما حدث فى أشمون الرومان يا ابن البدوى
حكيت لهم ما حدث وهنا قال الأمير بيبرس البندقدارى: عندى خطة يا مولاتى علينا أن نخلى مدينة المنصورة وكأننا انسحبنا منها ونستدرجهم ثم نقوم بالهجوم عليهم
رد أقطاى: أوافقك الرأى نظرت السلطانة إلى ابن إياس الذى هز رأسه موافقا ثم نظرت إلىّ
يعنى جت عليا طبعا موافق يا سلطانة وأنا لسه شارى مقروطة وقرن غزال واللى هيقرب هفتح دماغ أمه
نظرت السلطانة إلى أقطاى أرسل فى استدعاء توران شاه ابن زوجى من قلعة الكرك ليتسلم الحكم مكان أبيه الراحل
رد أقطاى: بس ده عيل غتيت يا مولاتى وممكن يقل معانا
قالت السلطانة: الوقت ليس فى صالحنا أرسل فى استدعائه فورا وأنت يا بيبرس جهز الجيش لملاقاة الفرنجة
بيبرس: سأخلى طريق النيل وأسحب الفرسان إلى داخل المدينة
وقال أقطاى: وأنا سأسحب فرسانى من على بوابات الكارتة وأدخل بهم إلى شارع جيهان
ونظرت إلىّ السلطانة: وأنت يا ابن البدوى؟
سيبيلى السكة الجديدة وشارع صيام وميدان أم كلثوم وأنا هروق الفرنجة هناك واللى هيقرب هغزه
قالت السلطانة: على بركة الله
خدت ابن إياس وطلعنا على شارع السكة الجديدة وقلت له: تعالى نلعب عشرتين طاولة لغاية ما الجنود يحاربوا الفرنسيس رد ابن إياس: إيه يامعلم مش قلت للسلطانة إنك هتنضم للجنود؟!
جنود مين ياعم الحاج ماتش ليفربول كمان نص ساعة؟!
قعدنا نلعب طاولة على المشاريب وطوقته فى 7 شاى و5 قهوة و66 حجر
المهم لقينا صويت وأحصنة وضرب ورزع قفلنا القهوة علينا
بعد الأصوات ما هديت طلعنا من القهوة لقينى جثث عشرات الفرنسيس واضح إننا انتصرنا
المهم لقيت واحد مرمى من الفرنسيس وشكله لسه فيه الروح جنب حمام بتاع الكنافة
رحت ماسكه ومكتفه هو كان فاصل شحن ومهيس
ابن إياس بيقولى: هتعمل إيه بالجندى ده ده شكله هيموت قبل ما نوصل شارع صيام؟!
مالكش فيه ياعم الحاج تعالى ناخد توكتوك ونطلع على قصر جديلة نقابل السلطانة
دخلنا عليها وأنا حاطط قرن الغزال على رقبة العسكرى الفرنسيس
وكان القصر مليان أسرى
وكان موجود القادة وللصدف السعيدة إبراهيم الأخرس وشلبى ابن خاله
أول ما الأسرى شافوا العسكرى اللى معايا ركعوا على رجليهم وبصوت واحد سمعتهم بيقولوا:
لويس نيف
السلطانة شجرة الدر شاورت لإبراهيم الأخرس يترجم
إبراهيم شاور للفرنسيس وبعدين شاور لشلبى ابن خالته اللى قال:
العسكرى اللى ابن البدوى أسره يبقى لويس التاسع ملك فرنسا
لقيت هرج ومرج ودخل عيل متنى عامل ديل حصان ومعاه كام عيل من اللى لابسين بناطيل مقطعة لسه هقول مين العيل السيس والعيال الخواجات دول لقيت قطز وأقطاى ركعوا
مرحبًا بالأمير توران شاه
الواد دخل وولع جوينت ولا عبر حد وبص للسلطانة وقالها:
واقفة وسط الرجالة ليه يا ولية اطلعى ع الحرملك
وأنت ياكابتن منك ليه وشاور عليا أنا وابن إياس
خدوا المسجون ودوه دار ابن لقمان
وبص فى القصر وبصوت عالى قال: يالا يا أفندية اللى مالوش لازمة يروح
خرجت أنا وابن إياس من بيت ابن للقمان وطلعنا على شارع صيام قعدنا فى قهوة مديح الآلاتى
قلت له: شفت الواد ابن الجزمة عمل فى المهلبية بالقشطة ايه؟!
رد ابن إياس قائلا: توران شاه ده عيل سو طول عمره بيكره شجرة الدر لأنه فاكر إنها وراء طلاق أمه من أبوه
والنعمة أنا لو من السلطانة كنت وديته ورشة وخرجته من المدارس مش أبعت أجيبه عشان يحكم مكان أبوه عموما أنا حاسس الموضوع مش هيعدى على خير
مديح جاب الدومينو والحلبة الحصا والشيشة
قعدت أرزع ابن إياس براويز دومينو لغاية ما رمى الورق وقالى: إيه حظ العوالم ده
لفينا جندى مملوكى يقترب منا ويهمس سيدى ابن إياس أن مولاتى السلطانة تريدك حالا أنت وابن البدوى
قمت فورا وخدت ابن إياس انجشيه وقلت للجندى: اسبقنى يا ابنى
ابن إياس قاللى: أنا خايف يا ابن البدوى
ليه ياعم الحاج؟
الواد توران شاه ما يتضمنش
عموما هنروح ونشوف
دخلنا القصر كانت الحراسة شديدة واصطحبنا جندى إلى الداخل وهناك وجدنا جثة توران شاه مفلوقة نصين وبيبرس ماسك سيفه بيقطر دما والسلطانة تقول: ماذا نفعل ولماذا تسرعت بقتله يا بيبرس؟
رديت أنا وقلت: ده عيل متنى يا مولاتى ولو الأمير بيبرس مكانش قتله كان زمانى غزيته وظفرت القرن الغزال اللى معايا
أنا كنت قاعد أنا وابن إياس بنحط خطة قتله بعد أن تطاول عليكى
قالت السلطانة: صحيح يا ابن إياس؟
طبعا يا مولاتى ابن البدوى كان قاعد يرسم براويز عشان يحدد هنهجم عليه إزاى
نظرت لى القشطة بالمربى وقالت: سلمت يمينك يا ابن البدوى
أنا سخسخت على روحى من جمال صوتها لكن فوقت على أقطاى وهو يسأل: أعتقد آن الأوان ليحكم المماليك البرجية ورد قطز وقال: ولماذا لا يحكم المماليك البحرية؟!
أنا حسيت الاتنين هيمسكوا فى بعض فقلت:
صلوا ع النبى يا جدعان انتم ناسيين أن لسه فيه فرنجة فى دمياط البلد كده هتفع
ابن إياس: طب وما العمل
أنا عندى حل جوز اللوز
ما هو يا ابن البدوى؟
لنعلن أم خليل سلطانة على المسلمين
نظر الجميع باستغراب وأنا قلت:
أظنكم شاهدتم رجاحة عقل المهلبية بالقشطة قصدى السلطانة وهى الآن الشخصية التى سيتجمع حولها المصريون ولنسميها عصمة الدنيا والدين أم خليل.
بعد أن أمضينا أكثر من شهر فى المنصورة ندون ما يحدث ونوثق عملية الإفراج عن لويس التاسع وصلنا دار ابن إياس بعد عناء وكانت ياسمين فى استقبالنا
بقولك إيه يا ابن إياس يا أخويا أنا تعبان من معركة المنصورة وضهرى قافش بعد إذنك ياسمين تيجى تطقطق لى ضهرى
يا أخويا المرة دى قاعد ولا على بالك مش خايف من مراتك ولا إيه يا ابن البدوى
ما أنا وديتها عند أبوها هى والعيال عشان أفضى لياسمين قصدى أفضالك
ماشى يابرنس بس عد الجمايل بتاع أخوك
ياعم ابن إياس خش مكتبك هتلاقى كشكولين مسطر ودستة أقلام فرنساوى ده غير الهاى لايت أنا مبدخلش بإيدى فاضية برضه بالإذن آخد عود البطل وأطلع فوق
فى الصباح كانت ياسمين تعطينى الفوطة الغارقة فى ماء الورد لأمسح وجهى
احنا ما تقابلناش قبل كده يا ياسمين
لا أدرى يا سيدى
طب ما كنتيش بتروحى عند سنترال الدقى ولا كنتاكى عباس العقاد أصل حاسس إنى شوفتك قبل كده
أنا لست من القاهرة يا سيدى
أكيد القمر ده من المنصورة
لا يا سيدى أنا من شرم الشيخ
يا بنت الايه افتكرتك انتى اللى كنتى بترقصى بالعباية السمراء فى قهوة آراب باكس اللى فى خليج نعمة
سمعت ابن إياس يصيح:
يا ابن البدوى مش ناوى تنزل ناموسيتك كحلى ولا إيه؟!
نزلت سريعًا فقال لى:
الله يخرب بيتك البلد مقلوبة وبيقولولك يعنى إيه تحكمنا واحدة ست
ده مجتمع ذكورى متخلف يا ابن إياس
تعالى مطلوبين فورا فى قلعة الجبل حتى نجد حلاً
دخلنا إلى القلعة كانت السلطانة تجلس على العرش ويقف أقطاى وبيبرس وشخص ثالث سألت عنه ابن إياس وعرفت أنه عز الدين أيبك أحد مماليك السلطان الناصر نجم الدين أيوب الله يرحمه
قلت لابن إياس: الجدع ده مطبلاتى ومحسوك وبتاع نسوان
سألتنى شجرة الدر: ماذا نفعل يا ابن البدوى ألست أنت صاحب الاقتراح الشعب يرفض أن تحكمه سيدة ومولانا الخليفة أرسل رسالة يقول: لو مصر ليس فيها رجال نرسل لكم رجلا من عندنا
وجدت أقطاى يقول للسلطانة:
الحل أن تتزوجى يا عظمة السلطانة
قالت باستغراب أتزوج؟ وممن؟
أيبك من تختاره مولاتى يكون زوجًا وخادمًا مخلصًا أمينًا
قلت لابن إياس هامسًا: مش قلت لك عيل منسون!
نظرت السلطانة إلى ابن إياس وقالت: وماهو رأيك يا ابن إياس؟!
نعم الرأى يا مولاتى
ومن ترشح؟
وجدت أقطاى يقول: وهل هناك غيره البطل المغوار الذى أسر لويس التاسع إنه الفارس ابن البدوى
قلت بصوت خفيض: ضيعتنى يا ابن الصرمة وهقول إيه لمراتى؟!
بصوت عالى قلت لشجرة الدر هروح أجيب ورقة بوستة من أول الشارع عشان المأذون وخلعت
لما رجعت بعد شهر دخلت منزل ابن إياس كعادتى وجدته يجلس على المكتب ويدون وما إن شاهدنى حتى قهقه ضاحكا:
أهلا بالراجل الهراب اللى خايف من مراته
وبعدين بقى مش خوف والله
طب عينى فى عينك كده يا ابن البدوى بقى يا راجل تقول لعظمة السلطانة أروح أجيب ورقة بوستة وتخلع
عملت فيها زى شويكار يا ابن إياس!
ومن هى شويكار جارية جديدة؟!
جارية مين يا معلم دى الله يرحمها حتة مارون جلاسيه السينما المصرية هبقى أجيبلك فلاشة عليها أفلامها المهم ايه اللى حصل بعد أنا ما خلعت؟
أبدًا يا سيدى السلطانة اتجوزت عز الدين أيبك
الراجل المنسون اللى كان معانا
منسون مين ده طلع راجل حويط اتمسكن لحد ما اتمكن وخلى السلطانة تروح تقعد مع الحريم فى الحرملك والليلة هيتجوز عليها ليه يا معلم دى السلطانة حتة قشط على مربى؟!
با ابن البدوى السلطانة عندها خمسين سنة
مش فاهم طلعت نافخة يعنى ولا إيه؟!
ماذا تقصد؟
أقصد راحت عند الدكتور ياسر ابن عمى عملت فيلير وبوتوكس وشفايف نانسى وصدر وورك فتاة سقارة عود البطل أس اتنين مش فاهمك
كبر دماغك المهم إيه المشكلة؟
هى أرسلت تطلب حضورى وسآخذك معى فى الغد
فى الصباح الباكر ركنا الجوز حمير بتوعنا على باب الحرملك ودخلنا
ابتسمت السلطانة أول ما شافتنى وقالت: أهلا بالراجل اللى خايف من مراته
ابتسمت وقلت: هو فيه راجل ما بيخافش من مراته يا مولاتى
فيه هباب البرك اللى اسمه أيبك ال ايه هيتجوزعليا
أيبك اللطيف الطيب الضعيف بقى أقطاى
اهدى بس يا مدام تحية كاريوكا قصدى يامولاتى السلطانة
أنا طالبة منك خدمة يا ابن البدوى
عيونى ياعظمة السلطانة
عايزاك تزفر المطوة القرن الغزال بدم أيبك
أيبك اللطيف الطيب يامولاتى
ايوة سى زفت
بس أنا نسيت المطوة فى شنطة العربية
انت بتخلع تانى يا ابن البدوى عموما أن كلفت حارس أمين يخلصنى منه وأنا فى انتظار الخبر
دقيقتان وسمعنا صويت وصراخ جاى من ناحية القلعة طلعنا لقينا جثة أيبك مرمية على الأرض ومراته أم على عمالة تشلشل عليه ويا سبعى ويا جملى ياللى مكنتش بتعز عليا حاجة
تقدم منها الحراس يساعدوها لكنها قالت اتركونى وابعتولى الولية أم زنجر فتوة القلعة ومعاها عشر نسوان
شوية وأنا واقف فى صحن القلعة أنا وابن إياس لقينا ست داخلة هى الحلقة المفقودة بين الراجل والست ومعاها عشر ستات زى حالاتها وطالعين إلى الحرملك وبدأ الصويت وسمعت صوت السلطانة شجرة الدر بتصرخ
قلت ل ابن إياس تعالى نحجز
قاللى لو طلعنا هيقتلونا أم زنجر بتضرب بالقبقاب تموت
10دقايق وكل حاجة كانت هادية ولقينا أم زنجر شايلة جثة السلطانة التى ماتت ضربا بالقباقيب ثم رمتها من فوق سور القلعة وقالت أم على محدش يشيل جثتها اللى هيشيلها هيتعدم
رجعت بيت ابن إياس وأنا حزين وسألته معقول نسيب جثة السلطانة كده مندفنهاش
أنت سمعت السلطانة الجديدة أم على اللى هيقرب من الجثة هيتعدم
بعد مرور يومين خرجت ليلا ومعى ابن إياس واثنان من الخدم إلى موضع الجثة كانت الكلاب للأسف تنهشها فقام الخدم بجمع ما تبقى منها فى شوال وذهبنا ليلا إلى قبة السلطانة التى فى شارع الأشراف بجوار مسجد السيدة نفيسة ودفناها هناك وصلينا عليها الجنازة
ونحن فى طريق العودة سمعنا منادى يقول: لقد تم خلع السلطان على وتولى الحكم المظفر قطز.
