جوزك على ما تعوديه.. حنفطر فين أول يوم رمضان ؟

أول يوم رمضان هو يوم العائلة ودايمًا بتكون فى مشكلة.. حنفطر فين أول يوم عند أهل الزوج ولا عند أهل الزوجة.

فى عائلات كتيرة بيكون عندها مشكلة فى الموضوع ده وإحنا كستات بنعانى الأمرين لأن كل عيله بتزعل جدًا، وطبيعى كل واحد بيبقى عاوز يفطر عند أهله، وطبعًا الأزواج بيترفعوا عن الدخول فى هذه الفرعيات وعلى الزوجات التنسيق بين الحمى والأم، وما أدارك ما هى صعوبة هذا الموضوع، لأن كل أم بتكون عاوزه ولادها أول يوم وطبعا بنقعد نقنع فيهم إن أول يوم زى آخر يوم رمضان، وإننا إن شاء الله صايمين الشهر كله وإن الشهر 30 يوم وندخل فى مناقشات وفى الآخر كل أم تُصر على أول يوم فطار عندها وبتكون الزوجة فى حيرة وبتضطر إنها تقسم اليوم جزء عند حماتها وجزء عند أمها،يعنى فطار عند حد وحلو عند التانى، و تانى يوم العكس وبكده نكون حاولنا نرضى جميع الأطراف، وغالبًا بترسى أن الطرفين قافشين.

ناهيك بقى عن صعوبة أول يوم رمضان من ناحية الصيام وعدم النوم، وتلاقى أغلب الأزواج تقول لك أنا صايم ومش قادر على أساس إننا أول يوم رمضان بنفطر ونتغدا وكده، على فكرة إحنا بنصوم عادى وبنبقى تعبانين بردو، مش انتوا بس اللى صايمين وتعبانين. 

وبعد الإقبال الرهيب على أول يوم باقى الشهر عادى،أيوه يعنى حنفطر مع حد ولا معزومين عند حد، أبدًا مفيش طيب وزعوا نفسكم على الـ30 يوم وبلاش زنقة أول يوم الشهر لسه طويل، وكل سنه وانتوا طيبين.