شايف حاجة تسحر

شايف حاجة تسحر. شايف حاجة جنان

بنت حلوة خالص. عيون ولا فى الأحلام

بنت سكاتها يلحس. . أمال لو قالت كلام

 

رموشها هواها ينعش. تقولش ريش نعام

شوف شفايفها النونو بتضحك بانسجام

تبان سنانها اللولى واضرب تعظيم سلام

 

ولا خدودها الوردى.. الجورى بتاع زمان

الورد يستخبى.. والفل يخاف يبان

ولا عيونها العسلى.. زى المغرب تمام

 

والقلب الصافى يقفش.. لكن مليان حنان

تيجى فى ودانى تهمس تقولش لحن كمان

أخاف عينيه ترمش وأقضى اليوم هيمان