جوزك على ما تعوديه.. إنتى بتزعقى على الصبح ليه.؟

أبدا ولا أى حاجة صحيت من النوم حلمت حلم سخيف فا قررت أزعق أول لما أصحى

طبعا ده أى كلام حضرتك،عاوز تعرف بزعق على الصبح ليه ورقة وكلم واكتب ورايا يا سيد الناس 

أولا بداية اليوم أنى لازم أصحى الكتاكيت علشان المدرسة وطبعا محدش بيصحى. نبتدى نظبط المنبه مفيش فايدة ابتدى أقوم أنده عليهم واحد واحد وافتح النور وابتدى كلام من نوعية يلا يا حبايبى يلا يا بابا حنتأخر على المدرسة، وبعدها تيجى مرحلة شد اللحاف من عليهم ولا كأنى بصحى أموات مش عيال نايمة، ولا حياة لمن تنادى لدرجة أننا كأمهات بنضطر نشيلهم حرفيا علشان ينزلوا رجلهم من على السرير علشان ننجز وبردوا ولا حياة لمن تنادى. فا فى هذه اللحظة السحرية أنا لو مزعقتش وبدأت أهوش بالشبشب مش حنلحق الترم مش اليوم. وبعد فقرة الصحيان تيجى فقرة الحمام ودى أصلا بنبتديها بيلا يلا علشان إحنا اساسا بقالنا ساعة بنصحى من النوم. وبعد طبعا الزعيق يطلعوا حبايبى من الحمام وعلى وشهم غضب ربنا ما يوريكوا وطبعا إحنا كأمهات بنكون لا طايقينهم ولا طايقين نفسنا.

وطبعا نيجى لفقرة اللنش بوكس ويتفتق لذهنهم برنامج الشيف الشربينى ويطلبوا بقى من المنيو.

كل ده وبتسأل بتزعقى على الصبح ليه ده أنا لو أطول أولع فى نفسى الصبح حولع.

طبعا حضرتك متعرفش التفاصيل دى لأن غالبا أنت بتكون نايم أو حتى لو صاحى مش بتشترك فى هذه العملية الانتحارية دى.

أحب أقول لك عزيزى الزوج أن الزوجة بتحتاج تقريبا لساعتين بعد ما العيال ربنا يكرمهم وينزلوا من البيت علشان تقدر تنسى آثار المعركة. خد بالك دى معركة متكررة يوميا مش حاجة عابرة.

أعتقد أنى وفيت فى الإجابة على السؤال. ونصيحة متسألش تانى أنتى بتزعقى على الصبح ليه ولا حتى على المغرب ولا أى وقت.لان سؤال زى ده مرة كمان ممكن يلبسك إنك أنت اللى تزعق وهى اللى تسألك أنت بتزعق على الصبح ليه؟

لا تسألوا عن أشياء أن تبدو لكم تسوؤكم