سوشى
منى رضوان
المثل بيقول كلّ اليّ يعجبك والبس اليّ يعجب الناس وأنا شايفة أننا ناكل ونلبس اليّ يعجبنا وبنحبه لذا أنا لا ألوم أى حد على لبسه أو أكله حتى لو كان سوشى.
أنا مبحبش السوشى ولا أتحمل طعمه ورائحته وشكله - حاجة كدة خلقة ربنا.
جربته مرة فى مكان راقِ فى التسعينيات ورجعت اديته فرصة تانية فى الألفينات وبعدها آمنت أن السوشى لم يُخلق لى.
لا ألوم محبيه بس أتسأل : «ما هو الجميل فى أكل شيء نى أو نصف نى»؟ ولما بقول كده لهم بيكون الرد: بتاكلى الفسيخ والرنجة عادى ومتاكليش السوشى علشان بتقرفى منه؟ وإجابتى أيوه حضرتك الفسيخ ده محفوظ بطريقة التمليح - هو مش سمك معفن زى ما كارهى الفسيخ معتقدين.
وبعدين ممكن أفهم إيه الحلو فى أنيّ آكل أكل مكعبات فى نفسه وأزلطه ويقولك ده لما يتاكل بال chopsticks بتحس إنك عايش التجربة بأكملها، تجربة إيه يا بيه؟ هو أنا نازلة اعمل سنوركلينج فى البحر الأحمر؟
أكتر اليّ قفلنى من السوشى هو مبدأ أن الأكل غير الناضج تمامًا أو نى أو نصف نى - لما بقول كده لمحبى السوشى الكتار إليّ حواليا بيردوا عليا رد مستفز: كلى سوشى مقلى يا منى مش هتحسى بحاجة من دى خالص… وهنا أقف وارفع حواجبى فى دهشة واقولهم: مش هحس بحاجة إيه؟ هو أنا رايحة اخد حقنة يا جدعان علشان تقولى مش هتحسى بحاجة؟ وبعدين أنا عايزة أحس واستطعم.
بعد ما قريت واتثقفت عرفت أنا ليه محبتوش وده لأن السوشى فيه صفة أنه acquired taste يعنى شىء طعمه مكتسب ومبنتولدش بنحبــه أو نكــرهه هو مش ملوخية - إحنا بندوقه ونقّيم طعمه مع الـtaste buds اليّ فـى لسـانا المسـؤلة عـن التذوق والمختلفة من شخص لآخر وعلى أساس كده نقرر عجبنا ولا لأ.
الشىء الآخر العجيب فى السوشى هو طقم الإكسسوارات الليّ نازلة معاه - مثلًا الوسابى وده شىء أشبه بالعجينة الخضراء الحراقة جدًا جدًا وفى كمان شرائح وردية رقيقة من الجنزبيل ودى بتاكل منها واحدة كل كام قطعة سوشى علشان تحس بطعم كل قطعة لوحدها من غير ما طعمهم يدخل فى بعض.
بالإضافة للأشياء سالفة الذكر هتلاقى مع السوشى طبق صغير بيضاوى الشكل غالبًا ومعاه إزازة صوص صويا بتدلق منها شوية فى الطبق الصغير وتغطس فيه قطعة السوشى على الخفيف وعادة الحريفة بياخدوا حتة Wasabi صغيرة يدوبوها فى الصوص ده.
أهل اليابان هم أهل السوشى وبيقولوا إن الوسابى بيحميك من أى أضرار ممكن يسببهالك الأكل علشان لو مش مستوى وعند هذه المعلومة قفلت تمامًا منه وقررت التزم بالأكل المستوى اليّ بحبه وأعرفه ومتربية عليه - مالها الفتة والمكرونة والكفتة الداود باشا؟ زى الفل وبناقصها سوشى فى حياتى.
