جوزك على ما تعوديه.. هات عيش وانت جاى

جملة طبيعية جدًا على لسان زوجة مصرية أصيلة كل هدفها إنها عاوزة عيش.

طبعًا دى أكتر جملة ممكن تضايق الرجل، حقيقى معرفش ليه أغلب الأزواج بتتضايق من الطلب ده، وكأنه حاجة عيب. هو بردوا بصراحة ومن غير مجاملات وقت الخطوبة بتلاقى الرسايل والشات فى حتة تانية خالص ،كله قلوب حمرا وورد وكلام جميل من بتاع بحبك ومقدرش أعيش من غيرك وما إلى ذلك من الكلام المعسول بتاع البدايات، فيا ولداه الرجل بيجيله نوع من أنواع التخلف العقلى بعد ما يتجوز، بتلاقى فى تحول  غريب فى نوعية الشات والرسايل، يعنى مثلًا: هات عيش وأنت جاي، معندناش لبن لفطار العيال، وأنت جاى عدى على البقال هات منه جبنة للعشا، متنساش بكرة آخر يوم فى دفع فلوس الرحلة لابنك، جاى إمتى علشان أحضر السفرة وأحمر الفراخ علشان متجلدش.

فالنتيجة إن الرجل بيتصدم من التحول الرهيب فى  العلاقة، إحنا كستات بنكون فاهمين ده لكن الرجل بيبقى فاهم بقى إن الحياة كلها حب فى حب، وإننا بنّام ونصحى بالميكب والبرفان، وشغل الأفلام الرومانسية وجو الفطار فى السرير والكلام الكبير ده. فخلاص يا جماعة لو جملة عدى هات لنا عيش دى مضايقاكوا بلاش منها خالص، وكمان  بلاش نعمل سندويتشات العيال وأقول لكم كمان بلاش نوديهم المدرسة علشان ميعدوش يجيبوا عيش لعيالهم فلذات أكبادهم وهما راجعين.