الـ«H.R» فى برشامة
منى رضوان
الإتش آر، أو إدارة الموارد البشرية، جزء أساسى من أى شركة، وتخصصاته متعددة.
هم مسئولون عن التوظيف والتدريب والتطوير وتنظيم العلاقة بين صاحب العمل والموظف، والحفاظ على ثقافة وهوية الشركة وبيقبضّونا آخر الشهر وبيوفروا بيئة عمل صحية وآمنة. معرفش ليه يا أخى مع إنهم زى الفُل ناس كتير قارشين ملحتهم.
وبما إنى مش موظفة إتش آر بس حبايبى كتير منهم اسمحولى أعمل قعدة عرب وصُلح وأدّيكم الخلاصة فى برشامة.
أولاً: الإتش آر أساميهم كبيرة ومجعلصة، وده مش طنطيت علينا: موارد بشرية، تنمية بشرية، أى حاجة فيها بشرية تبعهم، مش لازم نفهم كل حاجة، اعتبروها روشتة دكتور، مبنبقاش فاهمين وبرضه بناخد الدَّوَا.
ثانيًا: الإتش آر هو مدير أركان الكون وبعده ييجى مديرك فتَعايش ومتخدهاش بشكل شخصى، انت مش أحسن من محمد صلاح اللى قعد فى تشيلسى سَنة على دكة الاحتياطى علشان مديره قال إنه لا يصلح للعب فى انجلترا. آهو ربنا كرمه وراح ليڤرپول وبقى أحسن لاعب وهداف. الموضوع بسيط وانت بتصلى ادعى ربنا يبعتلك مدير زى يورجن كلوپ ولعلها ساعة استجابة.
ثالثًا: بلاش ثم بلاش تستفزهم وتقول عليهم مش متخصصين وممكن أى حد بأى خلفية يشتغل شغلهم، الكلام ده غلط. الإتش آر دارس بَرّة وجُوّة وعليه شوية إنجليزى وحروف مختصرة إنما إيه أورجانك.
رابعًا: هم بيحبُّوا يدّوا الدعم للموظفين بس مش لازم الدعم يبقى على مزاجك. مفيهاش حاجة لمّا يقولك إنه معجب بإخلاصك واجتهادك فى الشغل. متمسكوش من زمارة رقبته وتقوله اللى بيحبنى يزودلى المُرتب ويرقينى - خليك دپلوماسى،ابتسم وحسبن فى سرّك عادى.
خامسًا: الإتش آر بيتولد بشوية أسئلة مش هيغيرها: شايف نَفْسَك فين بعد خمس سنين؟ ماذا تعنى لك روح الفريق؟ إيه نقاط ضعفك؟
الإجابة: هو العَقد بتاعكم خمس سنين؟- ألم أوردر الأكل يوميًاً من الزملا- إنى طيب وبتخدع فى الناس بسهولة.
سادسًا: الإتش آر مشاكله كتير وعايش فى عالم كله تحديات وممزق يا حَبّة عينى بين المثاليات والواقع- لو شافك ومسلمش عليك بلاش سوء ظن وتقول إنه مطنشك.
سابعًا: الإتش آر لا يكذب ولكنه يتجمل علشان الإتش آر ده ناس والناس عادى بتعمل كده- كلنا بنعمل كده بلاش قسوة بقى.
ثامنًا: الإتش آر بيترقى كتير- مقولة متكررة والحل بسيط اشتغل إتش آر.
تاسعًا: الإتش آر دايمًا بيقول إنك هتكبر لو اشتغلت كويس، وده صحيح، كون قصده إن شعرك هيبيض وهيجيلك شيخوخة مبكرة وانت قصدك إنك هتترقى دى مش مشكلته.
عاشرًا: شوية ثقة يا أخوانا- اللى بيتعمله ميتنج مش لازم يتبعت فى ميل للإتش آر، ده نظام كمبيالات.
وأخيرًا a big shout out لحبايبى فى الإتش آر ولو عندكم وظيفة ابعتولى أى عَيِّل صغير.
