الحاج سردينة
منى رضوان
الحاج إبراهيم سردينة هو أحد الأبطال المهمة فى مسلسل (لن أعيش فى جلباب أبى) المقتبس عن رواية إحسان عبدالقدوس بنفس الاسم.
الشخصية دى مكانتش فى الرواية ولكنها كانت فى المعالجة الدرامية والسيناريو للسيناريست مصطفى محرم اللّى أضاف الشخصية المؤثرة دى للأحداث.
كان الحاج سردينة بمثابة الأب الروحى للبطل عبدالغفور البرعى وكان بيعتبره زى ابنه وبينصحه نصائح مهمة وحكيمة تتجاوز حدود المسلسل والأحداث وتصبح نصائح خالدة لكل الناس.
من أهم النصايح دى هو الليّ قاله له عن عدم الاستسلام للفشل والنظر للخلف، كانت كلمات الحاج سردينة بليغة، قاله:
«اوعى تبص وراك مهما حصل، بص لقدامك على طول، وكل ما تقابلك حاجة لازم تحسب حسبتها تمام قبل ما تخطى خطوة واحدة.
جايز تاخدلك هُدر وتقع، مش مهم.. المهم إنك متستسلمش وتنام، لأ لازم تقوم على طول» نصايح الحاج سردينة الليّ قالها بكلمات بسيطة جدًا فيها معانى ودروس مستفادة كتير:
- ركز فى إنك تمشى لقدام ومتبصش وراك، النظر للخلف بيقلل المضى قدمًا وبيعطل صاحبه على طول.
- آخد مخاطرات محسوبة وليست عشوائية ولا بطريقة عنترية، حساب المخاطرة بيبقى مؤشر حقيقى لنجاحها أو فشلها وده بدوره بيوجه الشخص للتصرف الصائب.
- قد ننجح أحيانًا ونفشل أحيانًا أخرى ومش مهم لو فشلنا.. لأن فى كل مرة من دول بنتعلم وعلشان كده الفشل بيعلمنا زيه زى النجاح.
- السقوط والعثرات هى بداية النجاح، النجاح يأتى من المحاولة والمحاولات هى نواة النجاح فلو خدت هُدر ووقعت قوم أقف وكمل.
- الاستسلام هو الفشل السريع الليّ مش هيجيب من وراه أى طائل.كلمة السر فى الاستمرار وليس الاستسلام.
- مش مهم لو وقعت وأخطأت، سامح نفسك لأنك من الأول معندكش ضمانات 100 % لا للنجاح ولا للفشل.
- هون الأمور على نفسك، جرب وحاول وحتى لو منجحتش متبصش وراك، امشى بشويش لو عايز بس متمشيش لورا.
فى كتاب صدر سنة 2022 للكاتب الأمريكى دانيال پينك اسمه قوة الندم ومحتواه شوية عكس رأى الحاج سردينة ونظريته بسيطة وهى:
أن النظر للخلف يدفعنا للمشى للأمام وهنا يقصد الكاتب أن تحليل الأخطاء والاستفادة منها بيخلينا نتعلم كويس ونفهم منعملش إيه تانى أو نعمل إيه بشكل أفضل.
فى الكتاب ده پينك بيتعامل مع الندم زيه زى النظر للخلف فى أمور لم ننجح فيها، وقسم الندم والنظر للخلف بأنه نوعان: نوع يصيبنا بالشلل وبنفضل بسببه نجتر الأحزان ونندم ونولول ونوع بيحّفزنا ويخلى نقطة الفشل بداية للانطلاق.
بين الحاج سردينة ودانيال پينك اختلاف جوهرى على مبدأ النظر للخلف، بس فى تشابه قوى أوى هو حتمية الاستمرار.. الليّ فى الآخر بيطرح سؤالا وجوديا: هل استمرارية المحاولة تضمن حتمية الوصول؟
أعتقد أيوه والحاج سردينة جاب من الآخر وأنا معاك يا حاج.
