رجعت الشتوية

يا ريت الناس اللى بتحب الشتا تدينى أمارة..

لمّا بشوف حد كاتب على شوقه للشتا بحس إنه بيتكلم وهو قاعد فى أوضة إزاز ومتدفّى وبيراقب قطرات المطر وهى ترسم لوحة جميلة على زجاج الشرفة وبيشرب القهوة ومشغل فى الخلفية أغنية رجعت الشتوية لجارة القمر فيروز.

وإيه الكلام الغريب على أزياء وألوان وحلاوة وجمال موديلات الشتا؟ نفسى أفهم أيه اللى حلو فى الألوان الغامقة بكل درجاتها؟ من بُنى لرمادى لكحلى يا قلبى لا تحزن.

ثم مش معقول علشان فى ناس بتحب شوربة العدس والبليلة والدُّرَة المشوى وحمص الشام والبطاطا السخنة والسحلب فالشعب كله يلبس فصل الشتا ببرده بمطره وبطينه وتراكم مَيّة الأمطار فيه علشان يحسوا بجمال الأكل والشرب ده.

ما تفوقوا يا جماعة وتعرفوا الشتا على حقيقته، إيه نسيتوا معاناة غسيل أى حاجة؟ لو غسلناها بمَيّة سقعة بنموت من البرد ولو بمَيّة سُخنة إدينا بتنشف وعلى آخر الشتا الشعب كله بيقشف وبيكرمش من جفاف الجلد.

 طيب نسيتوا الهدوم اللى مبتنشفش أبدًا؟ ولّا نسيتوا المعاناة لو نشرتوا الغسيل والدنيا مَطرت.

وبالنسبة لخطوة الحموم؟ كمّ التردد فى الخطوة دى فى الشتا بتخلى بعض الناس تجيب دفاية فى الحمَّام أو متستحماش أصلًا.

أمّا خطوة إنك تغيَّر هدومك أو تقوم من تحت البطانية أو تفكر حتى تفكير إنك متشغلش الدفاية، ده بيبقى تفكير متهور من شخص أهوج غير مسئول بيندم عليها فى خلال ١٠ ثوانى من رفع البطانية.

نيجى بقى لنقطة حساسة وهى موضوع الطبقات اللى بنلبسها فوق الهدوم وتحت الهدوم وبين الهدوم وبعضها.. شىء مرعب، طبقات طبقات وبنطلونات تحت البنطلونات وملابس داخلية صوف وثيرمال والعيال بتلبس ٢٠ فانلة و٣ بنطلونات ولكلوك وشراب وبونيه فرو ولمّا  الطفل من دول يرجع من المدرسة أو من برّة ويجرى يغيَّر هدومه بيعد نص ساعة يقلع فى الدولاب المتحرك اللى هو لابسه، وممكن ينام فى النص ده طبعًا مع العلم أن كل الهدوم مش لايقة على بعض وحاجة تلوث بصرى أجارك الله.

فى الشتا لو شربت حاجة سخنة بتبقى حاجة ساقعة بعد دقيقتين من أنها كانت سخنة، ويقولك بحب الهوت شوكليت فى الشتا، هوت مين يا حبيبى دى بتبقى لا تمُت للهوت بصلة بعد ما نحطها فى الكوبّاية بدقايق.

طيب بالنسبة لكميات الأكل اللى بناكله وبنبقى أفيال صغيرة بردانة؟ ويقولى بحب الشتا، شتا إيه وبتاع إيه خلوا الواحد كاتم فى قلبه. أنا من محبى الصيف بشمسه وجمال ألوانه وبَحره وهواه والدنيا اللى بتفضل منورة كتير والألوان الفاتحة الفرايحى وجمال المصيف ولون البحر مع لون السما والشمس، الصيف  فصل الحب والحياة والشتا فصل التخن والطفاسة.

وعادى بنشرب قهوة سخنة فى الصيف واللى مبيحبهاش يشرب آيس كوفى وميخوتناش.