صباحك زَىّ وِشّك
منى رضوان
مَهما كان الشخص أمّور وملامحه حلوة وجذاب بيعتبر جملة «صباحك زَىّ وِشّك» شتيمة لمّا تتقاله.
لسبب لا يعلمه إلا الله.. فى اعتقاد عام إن الجملة دى فيها نوع من التريقة أو إن فيها معنى ضمنى فحواه إنك يا إمّا قرد مسلسل يا إمّا وشّك عكر.. يا إمّا الاتنين.. ومن هنا بتترفع الحواجب استنكارًا لمّا حد يوجه التلات كلمات دول لحد.
يا ترى لو حد قال لك «صباحك زَىّ وِشّك» هتشوفها إزاى؟
من غير فزلكة وتعقيد هو حاجة من اتنين:
يا هتعجبك يا مش هتعجبك.. الفرق بين ده وده هو انت شايف نفسك إزاى ورؤيتك لذاتك إيه أبعادها وأنت كبنى آدم وجهة نظرك لنفسك وكينونتك عاملة إزاى.
تعالوا نتفق إن ردك هيبقى حسب نظرتك لذاتك وشايف انت فين وإيه: لو شايف نفسك لطيف وإنسان متفرد وعندك حاجات مبسوط إنها فيك أو وشّك مفرود وبتهزر واجتماعى ومش شايل طاجن ستّك هتاخد الكلام أنه شىء إيجابى ومجاملة حلوة ولطيفة وهترد مثلًا وتقول:
صباحى أحلى صباح، أو أحلى صباح ده ولا إيه أو النهارده الصباح حلو لأنه زى وشّى أو أى شىء من هذا القبيل معناه إنك متصالح مع نفسك وصباحك ومساءك ووشّك كمان.
ولو أنت شخص عبوس وكِشرى وقالب بوزك ووشّك مقلوب على ذاته أكنه فيونكة هتزعل أوى من الجملة دى وهيكون ردك:
ليه بتقولى كده، أنا عملتلك إيه! أو حد يقول لحد كده أو عيب كده ميصحش.. عمرك ما هتشوف إنها جملة إيجابية لأنك أنت ووشّك ونفسيتك وحالك ومالك ومحتالك شايفين إنها جملة تحمل بين ثناياها معنى ضمنى أنه يوم مهبب على دماغك وأن وشّك زى قفاك أو حتى قفاك جايز يكون أحسن من وشّك.
يقف الناس فى طرفَىْ نقيض مع صباحك زى وشّك بين أنها مدح جميل ومجاملة حلوة أو ذم شديد وتجريح وإهانة.
الحقيقة بقى إننا بنفسّر الجملة دى على هوانا وتجاربنا وانطباعتنا وتحليلنا للأمور.
قصة «صباحك زَىّ وِشّك» دى باللملى زى لما حد يقول «ربنا يدّيك على قد نيتك» فتتشال وتتهبد لأن نيتك سودة وقلبك محروق ومقرمش من جُوّاه يا بعيد. بتاخدها إنه بيدعى عليك ما أنت عارف نيتك بقى وربنا مطلع عليها.
فى حين أن اللى نيته كويسة هو اللى عادة يبادر ويدعى إن ربنا يديله على قدّها - ما هو عارف أن نيته بفتة بيضا ومفيهاش نفسنة وغل وحرايق ولا حرايق الغابات.
أنا كمنّى لمّا حد بيقولى «صباحك زَىّ وِشّك» بضحك ضحك جامد وأقوله أنا قمر وطالما زى وشّى يبقى مِيّة مِيّة، وأنت صباحك زَىّ وِشّك برضه إن شاء الله ولو مش عاجبك وشّك نمشّيها صباحك زى وشّى أنا.
