جوزك على ما تعوديه.. هو الحب بينتهى بعد الجواز؟
رغدة أبورجب
الحقيقة أنه مش بينتهى أبدًا ده بيبدأ بعد الزواج، بينضج وبياخد شكل مختلف.
العلاقات الصحية هى اللى الحب بيبدأ فيها بعد الزواج؛ لأنه ببساطة بداية الحياة مش نهايتها، الفكرة أن المسئوليات والروتين بينسّونا الحقيقة دى وبيخلونا نفتكر أننا فى مهمة رسمية مش حياه قررنا نعيشها ونستمتع بجميع تفاصيلها.
الفكرة دى بتخلينا فعلاً ننسى الحب وندخل فى دوامة الحياة اللى هى الشغل، مصروف البيت، تربيه الأولاد ومصاريفهم ومدارسهم و.. وعلاجهم وأخيرًا جامعتهم.
الفكرة فى الجواز هى الشراكة، ودى بتكون فى كل تفاصيل الحياة حتى بالاستمتاع بالتفاصيل الصغيرة اللى ممكن نشوفها حاليًا بسيطة.
أنا بشوف أن استمرار الحب بعد الزواج بيكون سببه الزوجة لأنها هى مفتاح المنزل وهى القادرة على السيطرة على زمام الأمور.
بمعنى أوضح لو هى هادية فى طباعها وغير انفعالية تلاقى البيت هادى وجميل وكمان لو عندها قدرة على السيطرة تلاقى البيت ماشى زى الساعة، وكل ده وهى لم تنغمس فى دوامة البيت والأولاد وعاملة حساب لزوجها ولحياتهم مع بعض، ده بيشجع الحب والتجدد.
لأن الزوجة كثيرًا ما تشعر بعد زواجها أنها خلاص كده اتجوزت وعملت الفرح ولبست الفستان الأبيض وخلصت الحدوتة وعملت اللى عليها ومش مطلوب منها حاجة تانية، طبعًا ده مش حقيقى نهائى وأن الجواز ده بداية الحدوتة مش نهايتها.
كل الناس تقول أحلى أيام كانت الخطوبة، المفروض أن أحلى أيام تكون الجواز لأنكم أخيرًا اجتمعتم مع بعض.
أرجوكم متنسوش أنكم اتجوزتم علشان بتحبوا بعض وعاوزين تكملوا حياتكم مع بعض، وده كان اختياركم بكامل إرادتكم ومش غصب ومش تحت تهديد السلاح.
افتكروا دايمًا أنتم تعبتم إزاى لحد لما توصلوا لليوم اللى تكونوا فيه مع بعض، فا مش بعد كل التعب والديون والخلافات العائلية بعد ما تبقوا خلاص تحت سقف واحد تتحول حياتكم لمهمة ويروح الحب والمَشاعر والشوق إلى الوبا..
الجواز بداية المشوار مش نهايته.
