الجمعة 29 مارس 2024
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

لطيف

 فى ناس بيكون لها من اسمها نصيب زى صديقى لطيف. 



قضيت رأس السنة فى أسوان والنوبة مع أعز أصحابى لمدة 3 أيام، لطيف هو أحد منظمى الرحلة - شاب صغير ويدخل القلب على طول.

بدأت الرحلة بمشاهدة الغروب من جبل المجاعة فى جزيرة سهيل، الجبل فيه صخرة موثق عليها السبع سنوات العجاف فى عهد الملك زوسر.

تانى محطة كانت لمعبد فيلة العظيم وهو معبد الملكة إيزيس الّلي تم نقله فى 1972 لجزيرة أجيليكا بعد ما كانت المية محاصراه بسبب بناء خزان أسوان ولما اتخذ قرار بناء السد العالى أصبح نقله «حتمى»، النقل استمر 8 سنوات تحت رعاية اليونسكو واتقطعت محتوياته واترقمت لآلاف القطع واتنقلت بنفس شكلها من قدام السد لوراه بمسافة حوالى 500 متر.

المعبد تحفة فنية فيه آثار رومانية ويونانية وفرعونية.

بعدها رحت معبد أبو سمبل الليّ كمان تم إنقاذه ونقله .المعبد رائع ويوثق انتصار رمسيس التانى فى معركة قادش وبتحصل فيه ظاهرة تعامد الشمس على وجه رمسيس التانى.

قبل نقل المعبد كانت الظاهرة بتتكرر مرتين فى السنة يوم 21 أكتوبر و21 فبراير وده يوم ميلاده ويوم توليه العرش - وفى رواية تانية بتقول إنها يوم بداية موسم الزراعة ويوم بداية موسم الحصاد، أما بعد النقل بقت يوم 22 .

تخيلوا : 4 تماثيل جمب بعض، رمسيس التانى وجمبه الإله رع حور أخته والإله آمون والإله بتاح إله الظلام - الشمس بتمشى مسافة 60 متر لقدس الأقداس وتسطع على وش رمسيس التانى لمدة من 20-25 دقيقة، المصريين القدماء عملوا المعجزة دى ودة معناه أنهم كانوا أعظم مهندسين.

تالت يوم واجهت خوفى من المرتفعات وطلعت قبة الهوا وهى جبل صخرى على الضفة الغربية من نيل أسوان ارتفاعه 130 متر.

فيه مقابر منحوتة لنبلاء وكهنة أسوان من عهد قدماء المصريين وفيه قبر على قمته الجنوبية لأحد الأولياء الصالحين اسمه «سيدى على بن الهوا» والليّ اتسمت القبة باسمه وهو ضريح أبيض له قبة واضحة من بعيد .

130 متر ده يعنى أكنها عمارة 43 دور .. لولا لطيف مكنتش هطلع، هو ساعدنى طول رحلة الصعود وشجعنى أكمل كل مرة كنت بقرر التوقف من الخوف.. ولما وصلت للقمة شفت النوبة وأسوان فى مشهد بديع وخلاب.

فى الرحلة عملت حاجات كتير: ركبت مراكب واشتريت فول سودانى وتمر وكركديه، لبست طاقية صاحبى بكار أبو كف رقيق وصغير ورحت جزيرة النباتات ولبست جلابية نوبى وحضرت حفلة الصوت والضوء واستقبلت العام الجديد وعشت لحظات جميلة جدًا وكسرت حاجز الخوف وطلعت جبل بمساعدة لطيف.

زى ما بنحب ناس احنا كمان بنحب أماكن لما بنعمل فيها ذكريات ومع أصحابى ولطيف ويحيى وعزت منظمى الرحلة أنا عملت ذكريات لناس وأماكن حلوة فى خبطة واحدة.