الجمعة 29 مارس 2024
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

تتريس Tetris

تتريس هى لعبة ڤيديوجيم صمّمها واحد روسى سنة 1984- اسمها منسوب لكلمة تيترا فى اللغة الإغريقية ومعناها رباعى وده علشان كل أشكال اللعبة مكونة من أربع قطع.



اللعبة شبه قطع أحجار البناء.

بسيطة فى فكرتها بس لعبها مش سهل.

باختصار بتقع القطع فيها بشكل عشوائى فى مساحة اللعب وعلى اللاعب تحريكها يمين وشمال أو يدورها بزاوية 90 درجة علشان يعمل خط أفقى مستقيم مفيهوش أى فراغات.

أول ما الخَط بيكمل بيختفى وكل القطع اللى فوقه بتنزل لتحت وكل ما كان اللاعب شاطر وسريع كل ما قدر يزود عدد الخطوط اللى بتختفى سوا وده بيزود نقطه.

مع إحراز تقدم فى مستوى اللعبة بتزيد سرعة نزول القطع ولو القطع تراكمت بدون تشكيل خطوط أفقية من غير فراغات بتخلص الجولة ويخسر اللاعب لما تتراكم القطع أعلى مساحة اللعب.

لعبة تتريس بتخلى الواحد يربط بين سرعة التفكير فى تحريك القطع وتحريكهم فعلًا فى مساحة اللعب المتاحة - لعبة شبه الدنيا والمواقف والناس- أقدر أحدد 3 نقاط تشابه كبيرة:

- ساعات الحاجة أو القطعة اللى بتدور عليها بتكون جمبك بس أنت مش شايفها لأنك مش باصص حوليك ومنتظر تهبط عليك القطع الصحيحة من فوق - فى حين أن الجزء الناقص قريب ولازق فيك.

كتير من الإجابات اللى بندور عليها قريبة مننا بس مش متشافة ولا مسلط عليها الضوء - لذا دَوّر قريب قبل ما تبقى زى القَرع بتمد لبَرّة.

- فجأة وأنت بتلعب تتريس بعد ما كنت ماشى كويس أوى بتتكربس القطع على دماغك وتستمر القطع الغلط فى السقوط - القطع اللى بتاخد مكان كبير بس مبتقفلش الفراغات فتفقد الأمل وتستعد للخسارة وفى ثانية تنزل القطعة الوحيدة اللى محتاجها علشان تكمل لعب وتتقدم- تظهر القطعة دى تقوم أنت تحطها بسرعة فى المكان الصح وفى ثوانى يتم منحك بداية جديدة وده يقولنا إن مش معنى إنك مش شايف الحل دلوقتى إنه مش موجود، لا ممكن يكون موجود بس لسّة مجاش ولمّا ييجى هتتغير الصورة تمامًا.

- تتريس بتعلمنا الصبر والاستمرار فى المحاولة - فى الأول وأنت بتلعب تتريس السرعة بتبقى بطيئة فبتتقدم بس كل ما بتتقدم السرعة بتزيد وممكن تلاقيها قفلت- بتصبر وتسيب القطع تقع بوتيرتها ومن تلقاء نفسها.

ساعتها ممكن تخسر جولة من اللعبة وبتبتدى جولة جديدة- خسارة جولة مش معناها خسارة اللعبة لأن دايمًا عندك فرصة تبتدى تانى وأنت مستفيد من خبرتك فى المحاولة اللى خسرتها.

الحياة وتتريس شبه بعض، فيها حاجات زى بعض بالضبط ولو طبقنا ما تعلمناه فى اللعبة على الحياة جايز أوى نطلع بنتائج جديدة أو بأشياء مختلفة عن ما كنا فاكرين.

ألعب تتريس وفكّر أن فى لحظة هتيجى القطعة المناسبة وساعتها هتروق الدنيا وتحلى.