جوزك على ما تعوديه.. وراء كل رجل عظيم امرأة أعظم منه
رغدة أبورجب
أيْوَه أعظم منه؛ لأن كل هَمّها وشُغلها الشاغل إنها تدعمه بكل ما لديها سواء جهد أو وقت أو مال، علشان هى فعلاً بتكون مؤمنة بيه وواثقة فى قدراته.
ومِش لازم يبقى «مِيسّى» علشان يبقى ناجح، فى نماذج وأمثال كتيرة جدًا لرجال نجحوا فى تحقيق أحلامهم ونجاحهم فى شغلهم بيكون راجع للزوجة اللى بتحمل على عاتقها كل جوانب الحياه علشان تدّى له مساحته لكى يتفوق فى حياته وشُغله.
وعلى فكرة؛ ده بيكون شعور متبادل بين الزوجين، يعنى الزوج الخَلوق المحترم بيرفع زوجته إلى أعلى وبيكون نجاحها من نجاحه وسعادتها من سعادته.
كل اللى يكون عنده فرصة فى النجاح على الطرف الآخر مساعدته لبلوغ حلمه وتحقيق هدفه، والنجاح على فكرة مش بيكون للشخص فقط؛ بل النجاح الأكبر للشخص الداعم له.
الدعم مهم جدًا لأن فى حالات كتيرة بيكون الشخص محتاج لحد يشاركه حلمه ويشاركه كافة التفاصيل ومساندته فى الفترات الصعبة والمشاكل.
وطبعًا الفكرة الأساسية أنها بتشيل عنه أعباء كثيرة علشان يتمكن فى التركيز فى شغله ونجاحاته، يعنى مش فى وسط الميتنج تكلمه أصل ابنك اتخانق فى المَدرسة، أو لا سمح الله تزعق فى العيال وهو فى البيت.. (المسامح كريم عدوها بقى)!
بس هى بتحاول علشان تدعمه وتوفر له بيئة صحية للشغل والنجاح.
هنيئًا لكل زوج ينعم بهذه الزوجة والفضل لكل زوج يدعم زوجته فى عملها ونجاحها.
ربنا يزيد من أمثالكم ويكتر من حبايبكم، أنتم خير مَثل للمساندة والتضحية.
وفى نوع آخر من السّتات بيحس إن نجاح زوجها ده بيأثر عليها وعلى نجاحها وده طبعًا غير صحيح بالمرّة وإننا مش فى مجال تنافس وغيره، وأن نجاحه ده جزء من نجاحك مش بيقلل منه بالعكس ده بيساعدك فى شغلك لأنه بيكون فاهم وواعى لمدى أهمية العمل والنجاح فيه.
نجاحه من نجاحك مش بيقلل منك بالعكس ده بيزيدك نجاح وتألق.
