2023 خشى علينا برِجْلك اليمين يا طاهرة
منى رضوان
سنة 2022 كانت كلها أحداث على الصعيد الشخصى والمهنى.. بس عدت.
على المستوى الشخصى عرفنا مين الناس العزاز ومين اللى طلعوا أندال بامتياز وده مكسب ضخم، أمّا على الصعيد المهنى فأنا اتعلمت وغامرت فى تجارب جديدة عمرى ما كنت أتخيل إنّى هعملها.
نسيبنا من 2022 ونحطها ورا ظهرنا ونبص لقدام ونكمل المسيرة.
كل سَنة بكتب حاجات أتمنى أعملها، منها ما هو صعب أو مستحيل، السَّنة دى قررت أقلل سقف أمنياتى وأبقى واقعية، الأمانى بتاعتى بسيطة وممكن تتحقق زى إنى آخذ الأمور ببساطة، متصرفش وأنا منفعلة، متعاملش مع اللى مش عايزة أتعامل معاهم، أمشى ورا إحساسى وأستثمر وقتى ومجهودى مع الناس المستحقة، أبعد عن الناس اللى مش شبهى وأرمى ورا ظهرى وفوق كل ده أفضَل إيجابية.
قررت أسمع أكتر ما أتكلم، ولو لقيت حد بيهذى أسيبه يهذى وأخلع لأن مش مهم نفهّم الناس كل حاجة، خليها تفهم وتتعلم بنفسها، لمّا بنحط على عاتقنا إننا نعلمهم بتطلع على دماغنا.
قررت إنى أترفع عن الصغائر وأركز فى الحاجات الفارقة.
قررت عدم تصحيح الكون، دى مهمتى لوحدى- هى مهمة مشتركة وفيها team work، من غيره مش هنتحرك من نقطة (أ) إلى نقطة (ب)، فلحد ما الـ team بتاع تصحيح الكون يلاقى نفسه ويكمل العدد ممكن الواحد يعمل حاجة يقدر عليها لوحده أو مع مجموعة تتفق حول هدف واحد وإن كان بسيط.
الاختلاف أفسد للود قضية فنتشعلق فى هدف موحّد أحسن.
فى 2023 بتمنى إن الناس تكون حقيقية، وحشة كانت أو كويسة بس يكونوا حقيقيين بدون مكياچ، يا ريت 2023 تخش علينا برِجْلها اليمين، تخش علينا ويحصل نقلة نوعية فى الحياة، منعدّش ونزيد فى الكلام، من الآخر نبطل كلام ونبدأ بالأفعال.
يا ريت كمان التعاملات تكون أحسن سواء أصدقاء، زمايل، معارف، غرباء أو حتى أعداء، الروح الانتقامية لازم تقل، مش بطلب الناس تحب وتدوب فى غرام بعض بس بلاش تتلكك وتطلع الناس همّها على اللى فى وشّها.
الموضوع مباشر: اللى مضايقك لو مش عارف تسامحه أو تستحمله امشى.
مع كل سَنة جديدة بنتعلم ونكسب ونخسر حاجات ومع إللى بنتعلمه أو نخسره بنكسب حاجات أثمن، نكسب الخبرة.
مقولة مقتنعة بيها أكتر من أى وقت مضى: سأعاملك كما تعاملنى فإذا وجدتنى لست كما تتمنى فأنت لست كما أظن.
كل سَنة وانتوا طيبين وتكون السَّنة الجديدة أحسن من السنوات الماضية- ومخبيش عليكم أتمنى فى سنة 2023 إنى أرجع أهتم بالأمور البسيطة فى الحياة- لقد هرمنا من التعقيد، وطبعًا أمنية مكملة معايا السَّنة دى وهو إنى أخس أو أطول شوية ومين عارف ربنا قادر على كل شىء.
