الجمعة 29 مارس 2024
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

التيلفزيون

زمان كان التليفزيون 3 قنوات وكان بيقفل ويفتح بالسلام الجمهورى والقرآن الكريم - مكانش فى سبعتلاف محطة فضائية ولا منصات مشاهدة.



التليفزيون كان جهاز تلتف حوله الأسرة المصرية فى مواعيد مقدسة  بيعرض برامج ومسلسلات من غير إعادات وكل واحد أو اسرة تستنى برنامجها المفضل بكل ولاء وحب.

برامج من جميع الأنواع: اجتماعية وعلمية ومنوعات وفنية وطبعًا رياضية ودينية.

محمود سلطان المذيع اللامع وصوته المميز فى برنامج عالم الحيوان ودكتور حامد جوهر وبرنامجه الساحر عالم البحار والليّ استمر فى تقديمه لمدة 18 سنة ومنال الأتربى ونافذة على العالم وهند أبوالسعود وجولتها مع الكاميرا ومواقف وطرائف من تقديم جلال علام وجملته المشهورة «مع البسمة الدهشة واللقطة النادرة».

أما برامج الأطفال الأشهر كان بيقدمها مذيعات ستات لقبهم ماما كذا زى عروستى مع ماما سامية (سامية شرابى) وسينما الأطفال مع ماما عفاف (عفاف الهلاوى) وصباح الخير مع بقلظ وماما نجوى (نجوى إبراهيم) وبرنامج تسالى اللى بطلته كرنبة ومقدمته ماما فاطمة (فاطمة سالم) وطبعًا أشهر مقدم برامج أطفال على الإطلاق وأقربهم لقلبى بابا ماجد (ماجد عبدالرازق) اللى قدم حدوتة قبل النوم وفنون وكارتون. 

نيجى لبرامج المنوعات والبرامج الفنية اليّ كان لها نصيب الأسد: هذا المساء مع سمير صبرى، العالم يغنى مع حمدية حمدى، يوسف شريف رزق الله وسناء منصور فى برنامج اوسكار وطبعًا تاكسى السهرة اللى قدمته أحلام شلبى ونهال كمال، اختارنا لك مع فريال صالح وسامية الإتربى وحكاوى القهاوى الليّ كان فيه أشياء تراثية خطيرة.

منى الحسينى وحوراها الصريح جدًا، طارق علام وكلامه الليّ من دهب،ونادى السينما مع الدكتورة درية شرف الدين ويوسف شريف رزق الله وطبعًا أمانى وأغانى البرنامج الذى لا ينسى الليّ قدمه عدد من المذيعين مش حد واحد وطبعًا طارق حبيب وأتوجراف وجملته فى نهاية كل حلقة «مع أجمل المنى وأرق تحياتى».

برامج اجتماعية وأشهرهم حياتى لفايزة واصف اللى قدمت المشاكل اللى بتجيلها بشكل تمثيلى من مجموعة كبيرة من الممثلين.

البرامج التوعوية والسياحية كمان كان لها وجود: خمسة سياحة مع چانيت فرج وسر الأرض.

البرامج الدينية هى كمان ارتبطنا بيها جدًا: خواطر الشعرواى مع الشيخ الفذ محمد متولى الشعراوى والعلم والإيمان للعبقرى مصطفى محمود وحديث الروح مع الشيخ عبدالله شحاتة.

أيام التليفزيون القديمة مكانش فيها حيرة القنوات والمنصات، مكانش فى مشاهدات حصرية خاصة، كل الأعمال بتتعرض على القنوات الأرضية فى مواسم وأوقات متحددة بالدقيقة والثانية.

ماتشات الكورة كنا بنشوفها من الأستاد منقولة فى لحظتها تليفزيونيًا ويجى رمضان وبيزود معاه خطة البرامج والمسلسلات لتشمل الفوازير وبرامج يومية نازلة فى خطة المشاهدة تزامنًا مع المناسبة دى.

مكانش ساعتها فى دش - كان فى إريال معدنى طالع من الاختراع العظيم اللى اسمه تليفزيون.