مطلوب GPS

الچى پى إس هو اختصار لتكنولوچيا بتساعدنا فى تحديد المواقع بتاعة أى حاجة فى أى حتة فى أى وكل وقت. اسمه بالعربى نظام التموضع العالمى، وهو نظام عالمى للملاحة عن طريق الأقمار الصناعية اللي بتقدر عن طريق الإحداثيات تحدد لنا مواقع الأماكن وترسم مسار لها من نقطة تواجدنا بوضوح على خريطة بنمشى عليها لحد الوجهة الليّ عايزين نروح لها.

الچى پى إس له فوايد كتير من الناحية التقنية.. بيعمل حاجات فى معناها العميق مبيعملهاش الناس مع بعض.

الچى پى إس بيحدد مكانك فين من النقطة اللى عايز توصلها، بيرسم خطوط واضحة سواء مستقيمة أو مش مستقيمة وبيوريك الرحلة هتبقى إزاى من قبل ما تتحرك من مكانك، مبيفاجأجش ومتبقاش عارف أنت هتمشى إزاى، بيدّيك فكرة عن الرحلة قبل ما تبتديها، وبيكون عندك كل المعلومات وبتاخد قرار تمشى فى الطريق المرسوم ولاّ لأ.

الچى پى إس بيعرض عليك بدايل ويحددهم لك علشان تشوف أيُّهم يناسبك، مع كل طريق مُقترَح بيتغير المسار وزمن الوصول، ممكن بنفسك تختار السكة الأطول علشان أسرع أو تختار الأقصَر حتى لو أزحم، بيعرض عليك اللى عنده من اقتراحات. غير الناس اللى لو ممشتش فى السكة اللى راسمنها لك مبيدوكش بدايل ولو متوافقتش مع اختياراتهم تبقى مش فاهم أو غلطان أو حتى تتصنف ضدهم.

الچى پى إس بيتكلم معاك ويقولك إيه اللى جاى فى طريقك، مفترق طرُق، زحمة، كوبرى، تحويلة مرورية أو حتى طريق سَدّ. فى حين الناس والحياة يفاجؤك.. هوپ تلاقى حاجات مش عارفها ولا فاهم ليه عملوها وعليك فك شفرة تصرفاتهم والتعامل مع ما يصاحب ذلك من كدر وزعل.

الچى پى إس لو ممشيتش من الطريق اللى اختارهولك أو مسمعتش كلامه مش هيطربق الدنيا على دماغك، حتى لو فوّت فتحة أو مفترق كان لازم تدخل منه بيضبط نفسه تانى ويقترح عليك مسار بديل، فى حين الحياة وبعض من فيها لو انحرفت قليلًا عن اللى عايزينه أو عملت اللى انت شايفه مناسب ليك بتدخل فى مهاترات ومناقشات بيزنطية لا تنتهى.

الچى پى إس متاح لنا فى أى وقت وكل وقت، تقدر تعتمد عليه وتلجأ له من غير ما تفكر لحد ما يوصلك لمكانك المنشود، غير الناس لا يمكن تعتمد عليهم فى المطلق فى إنهم يوصّلوك لما تريد أو تبحث.. ساعات ممكن الناس يتوّهوك بتصرفاتهم.

التكنولوچيا قدمت لنا اختراع زى الچى پى إس نقدر نعتمد عليه، فى صفات ومميزات فيه ممكن لو الحياة وما فيها من ناس يخدوا بعض من مبادئها حاجات كتير هتفرق فى حياتنا...محتاجين ناس تدلنا على الطريق وتمسك إيدينا لبَرّ الأمان، محتاجين چى پى إس إنسانى ومن هنا أرفع شعار «مطلوب GPS»