جوزك على ما تعوديه.. كبَّر دماغك

 فى مواضيع كتيرة جدًا بتحتاج من الراجل إنه يكبَّر دماغه فيها وميكبَّرش الموضوع وميقلبهاش خناقة، بمعنى أدق مِش كل موقف يتحول لخناقة، فى مواقف بتبقى سخيفة بس ممكن تعدّى من غير لوم وعتاب..

طبعًا حتقولوا طيّب ما السّتات كمان مش بتكبَّر دماغها وبتعمل مشكلة على طول من موقف ممكن ميستدعيش خناقة، الكلام موجَّه للرجُل وللسّتات ولكن للرجُل بصورة أكبر؛ وذلك لأن الرجُل المفروض بطبعه يتسم بالحكمة والتأنّى فى اتخاذ القرارات، وده عكس كثير من السيدات اللى ساعات كثيرة بتنساق ورا مشاعرها، فا قرارتها بتكون تحت ضغط المَشاعر، وكمان المرآة بطبيعتها هشة جدًا وممكن بكلمة واحدة تنهى الموضوع، فا هذه المَرحله بنعول على الرجل فى إنقاذ الموضوع وتكبير الدماغ.

وتكبير الدماغ ده مش معناه انك كده بتسيب لها الدنيا وبتكون هى المسيطرة على زمام الأمور؛ بالعكس تكبير الدماغ بيثقل من رصيدك عندها وبتفهم إن وقت ما بتزعل بيبقى بجد وبيكون زعلك غالى وعزيز عندها، غير لمّا تكون سريع الزّعل والغضب، فابيبقى الطبيعى إنك زعلان وغضبان على أى مشكلة حتى وإن كانت هايفة لا تستحق.

وبالعكس هى لمّا تشوفك على طول بتكبّر دماغك ولسْتَ من محبى المشاكل والقفش حيكون مصيرها بعد شوية لنفس الشىء وحتقدّر جدًا تكبير دماغك فى كثير من المواقف.

مش كل شوية لازم نتخانق ونزعّق على هيافات، خلى اليوم يمشى من غير زعل، المواقف الكبيرة هى اللى ممكن نزعل منها ونقفش فيها، زَوَّق معايا اليوم ده لسّه احنا داخلين على ارتفاع فى الأسعار حيقابله خناقات زوجية على كل الهيافات بداية من سعر الأرز وصولاً إلى سعر كيلو الفراخ، وفّر مجهودك وصحتك للقادم.