السبت 28 يناير 2023
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

جوزك على ما تعوديه.. ادفع مخالفاتى لو سمحت

هى المُخالفات على مين؟ مخالفات الزوجة الأصيلة اللى بتربّى عيالك.



السؤال ده مهم جدًا حاليًا بما أننا بنعيش فترات الرادار اللى فى كل حتة وبيصوّر كل الناس، فا فى بند فى مصروف البيت لا بُد أن يخصص للمخالفات. 

وبما أن الزوجة ضعيفة ومنكسرة (طبعًا دى حجّة علشان ناخد الفلوس وبعدين ترجع ريما لعادتها القديمة) ودائمًا بتحتاج للرجل فى حياتها لمساندتها ومشاركتها جميع تفاصيل حياتها، ومن أهم التفاصيل فقرة دفع المخالفات.

وبعدين هى المخالفات دى أخدتها الزوجة الغلبانة ليه، مش علشان الولاد والمدرسة والتمارين؟.

ما هو إحنا على طول بنجرى وعلى طول كلمة يلا علشان اتأخرنا ملازمانا فى حياتنا، وأصبحت العربة الطائشة منزلنا الثانى، بيذاكروا ويناموا وأحيانًا كثيرة بياكلوا فيها، على طول بنجرى علشان منتأخرش على الكابتن أو الدكتور ونسمع كلمتين حلوين، فا دائمًا متجاوزين السرعة ومتلهوجين فى حياتنا كلها.

فا رفقًا بالزوجات المسحولات، مفيهاش حاجة لو دفعت المخالفات وتبقى زوج جميل وطيب، وخد بالك هى الدنيا إيه غير يوم ليك ويوم عليك، النهارده تدفع المخالفات بكره هى حتشيلك فى حاجة تانية وتبقى كسبت بُنط.