مقابلة شخصية

كنت بوَصَّل ابن اختى مشوار وبعدين كنت هرجّعه، رحت قعدت فى مكان مستنية معاده ييجى.. وشربت قهوة وعملت مقابلة شخصية معايا فتحت فيها قلبى ليّا وصارحتها وخدت واديت معاها وسألت نفسى: يا ترى يا مُنَى تقيّمى نفسك ازاى فى رحلتك فى الحياة لحد دلوقتى؟ نجحتى فى إيه وفشلتى فى إيه وإيه اللىّ لسة عايزة تحققيه؟ 

السؤال ده خلانى أشغل مخى وأفكر فى حياتى الماضية كلها والسؤال جاب سؤال أعمق: لو ممكن يا منى الرجوع بالزمن، إيه النصايح اللىّ ممكن تديها منى الكبيرة لمنى الصغيرة؟:

 1 - إنت مش فى مقارنة مع حد، إنت بتنافسى نفسك بس وبتحاولى أن منى بتاعة النهاردة تبقى أحسن من بتاعة امبارح، المنافسة مع الآخرين تخلق بُغض كبير واحنا مش زى بعض علشان نقارن نفسنا بغيرنا.

 2 - انت متعرفيش ومش هتعرفى كل حاجة، الحياة بتعلمنا وهتفضل تعلمنا، معرفتنا بالحياة وخبرتها محدودة مَهما كنا متعلمين ومعانا شهادات.

 3 - استثمرى وكرّسى نفسك ووقتك ومجهودك مع الناس اللىّ هتعمل كده معاكى.. الدنيا اتجاهين مش اتجاه واحد.

4 - الحياة مفيهاش صُدَف، كل شىء بيحصل لنا له سبب وفى الوقت المناسب بنعرف الأسباب فمتستعجليش.

5 - متخافيش وقدّمى وجرّبى، اكسرى حاجز الخوف لأن الخوف بيفرمل وبيبقى عائق كبير لتطورك فى أى حاجة، الخوف زى الديب، يا يمسكك يا تمسكيه، الاختيار بتاعك.

6 - الناس كتير ومتباينة، فى ناس كويسة وناس مش كويسة وده شىء معروف، بس العلاقات الناجحة بتكون مع الناس اللىّ بيقبلونا ويحبونا زى ما احنا، الناس اللىّ عايزة تفصّلنا على مقاسها ممكن تروح لترزى.

7 - اعترفى إنك فى الحياة بتتعلمى ومن أهم الحاجات اللىّ بتعلمك هى غلطاتك.. اقبلى غلطاتك بس خليكى ذكية ومتستحمريش وتكرريها.

8 - العلاقات مهمة على كل الأصعدة وفى علاقات مرهقة على كل الأصعدة برضه، حاولى متخليش علاقات الأصدقاء واللىّ بتحبيهم من المرهقين لأن دول انت بتختاريهم بنفسك ولنفسك فأحسنى الاختيار.

 9 - الكون بيمشى فى سلوك دائرى: كما تُدين تُدان، كل ما تزرع تحصد، الخير بيلف ويرجعلك وكذلك الشر.. مفيش حاجة بتضيع، ربنا شايف ومتطلع، وعلشان كده حطى فى الكون من حواليكى كل الطاقة الإيجابية اللى بتدوّرى عنها فى المقابل.

10 - الحب من غير أمل مش اسْمَى معانى الحياة، ده غباوة.الحب أكبر بكتير من اختزاله فى راجل أو ست، حب الله، حب الوطن، حب الأم، حب الأب، حب الراجل والست، الحب لكلبك أو قطتك كلها أوجُه للحب، لو فى وش مشفتهوش متزعليش لأن مش كل الناس نصيبها تحب وتتحب من بشر.. كلها أرزاق يا منى.

مقابلتى الشخصية مع نفسى استغرقت ساعتين، عملت فيها فلاش باك وقيّمت نفسى وأقدر أقول إن الدنيا شاقة بس تستحق أنها تتعاش.