الجمعة 29 مارس 2024
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

جوزك على ما تعوديه..لا الستات ملزمة ولا الرجالة مجبرة

الجواب باين من عنوانه زى ما بيقولوا، الستات مش مجبرة على كل الحاجات اللى بتعملها فى بيتها من تحضير الطعام وتوصيل المَدرسة وعمل الأكل الخطير اللى جوزها بيحبه، ولا مجبرة على تربية أولادها تربية سليمة علشان يطلعوا ناس صالحة فى المجتمع.. كل ده بتعمله علشان هى عاوزه تعمله وعلشان نفسها جوزها يرجع من الشغل مبسوط ومستريح لمّا يلاقى الأكل اللى بيحبه. 



وبتربّى أولادها وبتاخد بالها من دراستهم علشان نفسها يطلعوا أحسن منها.. هو ده المقابل اللى بتكون عاوزاه .

ولا الراجل مجبر على تربية أولاده واحتواء زوجته ، ولا المشاركة فى الطبيخ وتحضير الطعام ولا حتى تمريض زوجته أو أولاده؛  كل ده بيتم بالحب والتفاهم، مفيش عقد ملزم للطرفين بمهام كل واحد. الحياه اللى احنا بنعيشها حاليًا كلها ضغوطات والتزامات ويا دوب الزوجين بيحاولوا يتجاوزا كل ده علشان يعيشوا ويربّوا الأولاد.

كل واحد طبعًا ليه دور ولكن فى ظروف كتيرة جدًا الأدوار بتتغير وبيبقى إجبارى عمل الدور.. مش اختيارى.

بيقولك الزوجة واجب عليها الطبيخ والاهتمام بالبيت والأولاد والزوج ومراعاة كافة تفاصيلهم، وكل ده ممكن تأخذ عليه مقابل مادى مفيش حاجة اسمها واجب مبدئيًا كده، احنا كزوجين قررنا أننا نعيش مع بعض ونتشارك كل اللحظات الحلوة والوحشة، فكل واحد فينا بيبقى ليه دور على المَركب علشان تمشى ونعرف نكمّل، وممكن جدًا نتيجة اختلاف الوقت والظروف تتغير هذه الأدوار وممكن أحيانًا تتوقف، لكن الأكيد إن مفيش حد مجبر على حاجة. 

دى حياة  قررنا أن  نعيشها احنا الزوجين دون أى ضغط من أى شخص، ده شكل العلاقة اللى احنا اخترناه محدش جبر حد على حاجة.

وأعتقد أن الزوجة حيكون أهم بالنسبة لها الاحترام والتقدير والمشاركة من المقابل المادى.  وهى دى المَوَدّة والرحمة اللى ربنا قال عليها ووصّانا بيها.

الدنيا والظروف والعيشة بقت صعبة جدًا فيا ريت منصعبهاش احنا على نفسنا.>