كل البنات بتحبك
منى رضوان
إزاى تخلى البنت تحبك؟ سؤال جَدلى وبسيط بس كبير وإجابته على مدار السنوات بتتغير وممكن تبقى أى شىء وكل شىء.
معرفش إزاى بعد كل التقدم العلمى اللى وصلنا له لسّه مفيش إجابة شافية وافية للسؤال ده - إزاى مفيش أپلكيشن تديله بيانات اللى عايزها تحبك فيديك الإرشادات فتعملها وبعد كدة تعيشوا فى تبات ونبات وتخلفوا صبيان وبنات- ما يلى رأيى وأجرى على الله فى ٣ نقاط مختصرة، ومن الآخر:
- اسمعها علشان تفهم مش علشان ترد:
الست بطبعها بتعبَّر عن نفسها بالكلام وعلشان كدة يُطلق عليها بعض المغرضين صفة الرغاية، ولكن فى الحقيقة الكلام هو الأداة اللى بتعبّر بيها عن نفسها وعن أى حدث بتمر بيه سواء كان كويس أو وحش، أو شىء عايزة تشركك فيه معاها. لمّا تسمعها ده معناه إنك مهتم وأنها فارقة معاك.
- افتكر التواريخ كويس: اهتمامك بالتواريخ المهمة اللى بينكم معناه إنك فاكرها هى- يعنى يوم ما اتقابلتوا، يوم ما اعترفتلها بحبك، يوم عيد ميلادها، يوم عيد جوازكوا، يوم عيد الحب، يوم ولادة ولادكم.. حتى يوم المرأة العالمى تفتكره لأنك لو نسيت أى تاريخ لا تلومَنّ إلا نفسك.
- خصّص لها وقت بتاعها: خلى فى وقت محدد ومتفق عليه معاها بتاعها 100 ٪ من غير شريك، ولازم يكون الوقت ده هى عارفاه ومستعدة له نفسيًا.. وإياك ثم إياك بعد ما تتفق معاها على وقت علشان مثلًا تخرجوا بعد كده تقولها ممكن فلان ومراته ييجوا معانا؟ ده معناه أن الوقت المخصص بتاعها فيه شريك- وفى الحالة دى يبقى أنت عليك واحد.. لو هى اقترحت ماشى بس أنت خليك ناصح ومتقعش فى الخية.
- لا تقلل من اهتماماتها: ودى قاعدة سواء اهتماماتها كانت النظرية النسبية لأينشتاين أو المسلسل التركى اللى فيه حلقات شغالة بقالها خمستاشر سنة.
أيًا كانت اهتماماتها خليك ذكى ولا تتفه منهم حتى لو مش عاجبينك.. لمّا تكلمك عن لون الروچ الجديد أو موضة معينة متقلبهاش تريقة. خد بالك أن اهتماماتك بالكورة والعربيات وماتشات الدورى والكاس ودورى أبطال أوروپا ومين جاب كام جول ومين أحسن لاعب وكل الحاجات دى هتتسمع لمّا أنت تهتم باللى بتحبه فخلى عندك بُعد نظر يا صاحبى.
لمّا حسام حسنى غنّى «كل البنات بتحبك» أكيد كان قصده على حد بيعمل الحاجات اللى فوق دى:
«كل البنات بتحبك كل البنات حلوين.. طبعًا يا سيدى يا بختك وأنت اللى زيك مين؟
ليه البنات شغلانى بتعدى مش شايفانى وأنت اللى يوم والتانى يسأل عليك ملايين.
ولا حاجة فيك نقصانى طب ليه العيون تنسانى وأنت يادوب فى ثوانى فيك القلوب دايبين؟»..
الحقيقة الدامغة أن الراجل اللى كان بيتكلم عنه المطرب الجميل حسام حسنى فهم الفولة وطبّقها لذا كل البنات بتحبه...وصلت؟
