الجمعة 2 ديسمبر 2022
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

لقيت الطبطبة

مين منّنا يقدر ينسَى ولاد كالابالة الأرنبة اللى سمّاهم عادل إمام فى مسرحية (شاهد ما شافش حاجة): تيمور وهندى ومنجاوى وعويسى.



هذا المشهد يداعب خيال كل محبى المانجا على اختلاف أنواعها وهى من الفواكه اللى لها قاعدة عشاق كتير.

تبدأ الرحلة مع المانجا من أول ما يبدأ فصل الصيف ومع بشاير المحصول الزراعى للثمرة العظيمة دى تبدأ مرحلة الاندماج المميز بين محبى المانجا، والمانجا ذات نفسها.. اندماج وعلاقة بتبتدى من وأنت بتمسكها وتشمها حتى قبل ما تشتريها.

المانجا فاكهة تطبَّق سياسة العنصرية بشكل مشروع لأن أنواعها أمزجة عند ناس دون ناس ولكل نوع عشاقه الأوفياء.. أنا مثلًا متعصبة للتيمور وولائى الأول والأخير له بلا منافس يليه الفص العويس بفارق كبير.

المانجا فاكهة بتحب الجمع والتعدد.. تعدد مش هنختلف عليه ومفيش حاجة اسمها كلت مانجية.. هى بتتعد زى الحمَام كده بالجوز.

المانجا برضه مبتاكلهاش لوحدك.. بتاكلها أنت وعقلك وقلبك وكل جوارحك وطبعًا ساعات قميصك وبنطلونك.

المانجا تفقد نص جمالها لو اتاكلت فى الحمَّام أو اتاكلت على الواقف.. تؤ تؤ تؤ.. أنت لازم تعمل قاعدة تليق بيها وتختار مكان مريح تقدر تعد فيه وترص المانجا قدّامك وتبدأ الرحلة اللذيذة.

يقال إن المانجا لمّا بتتاكل بالملعقة طعمها بيبقى أقل حلاوة من لمّا تاكلها بإيدك.. فى هذه النقطة تحديدًا أنا مش هعرف أضيف لأنى مباكلهاش بإيدى ولا يقلل ذلك بالمَرّة من شأنها بس أرجع وأقول هى مدارس.

بس لو بتاكلها بإيديك أنصحك متاكلهاش غير فى بيتك ولو كلتها قدام خطيبتك وكملت فى الجوازة أعرف إنها بنت أصول وبتحبك ونفس الشىء لو ست كلتها قدام خطيبها.

عصير المانجا ده ليس له علاقة بأكل المانجا.. ممكن الطعم يكون واحد بس التجربة مختلفة تمامًا.

المانجا هى تانى أكتر شخص بعد مامتك وباباك اللى هتسعدك وتفرّحك.. كل من لم يجد من يحنو عليه بعد ما لقى المانجا حياته اتحسّنت.

زى ما قلت المانجا أنواع كتيرة زى الصديقة والعويس والفص والفونس والهندى والسّكرى..ويبقى النوع المفضل عندى وهو التيمور ليكون عندى البريمو وهو قليل شوية فى السوق.

مش عارفة أقولهالكم إزاى يا جماعة خصوصًا أنى برضه عندى جوانب عميقة فى شخصيتى بس هقولها واللى يحصل يحصل.

أغنية حسين الجسمى «لقيت الطبطبة» متناسبة جدًا مع علاقى بالمانجا التيمور.. وبعد ما بكلها أقدر أقول بعلو صوتى إنى لقيت الطبطبة.

وخصوصًا كوپليه: «أتارى كُل ما أحب فيك.. بدمنك وبقيت مزاج

أتلحق بقى دى ف إيديك.. ما أنت فى لُقاك العلاج».

ملاحظة: يا ريت من غير شتيمة من فضلكم علشان پرستيچى وكده.

ويا ريت أسرتى تمتنع عن التعليق حفاظًا على الروابط الأسرية.. وشكرًا.