الجمعة 2 ديسمبر 2022
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

جوزك على ما تعوديه.. لما تعرفى تسكتى ولا تواجهى؟

ده سؤال مُحَير جدًا وفى وجهات نظر مختلفة فيه. مجموعة تقول لك لو علاقة عابرة اعملى نفسك مش شايفة وهو بعد شوية حيرجع تانى، المهم إنه يكون بيصرف عليكى وعلى ولاده ومش مقصر، فا المواجهة فى الحالة دى ممكن تأثر سلبًا على علاقتكم وتضطرى يا إمّا تطلبى الطلاق أو تقبلى بالوضع لو اتمسّك بيها، أو تخدى وعود إنها مجرد نزوة ومش حتتكرر تانى.  وفى زوجات كتيرة بتبقى عارفة وساكتة علشان ولادها وحياتها بس طبعًا بيبقى هاين عليها تحط له سم فى الأكل.



وفى وجهة نظر تانية تقول لك لفّى الحبل حولين رقبته واجمعى الأدلة والبراهين وواجهيه بالحقائق كلها وحسب مرحلة العلاقة الأخرى يا إمّا تطلبى الطلاق يا إمّا تخدى ضمانات بعدم تكرارها، ودى بتكون إنتى ونصيبك بقى، يا فعلا مش بتتكرر تانى يا شوية وتلاقى المعلومات جاية لعندك تانى بدون أى مجهود.

وجهتين النظر موجودين، وطبعًا كل واحد بيشوف حيقدر على إيه، فى نوعية ستات بتكبَّر دماغها وتقدر تغفل وتتغاضى عن مثل هذه الأشياء، وفى نوعية من الستات الأخرى لا تقبل بمثل هذا العبث، وبتشوف إن أى علاقة حتى لو عابرة تُعَد خيانة.

أعتقد أن كل حالة بيكون ليها نقاطها وتفاصيلها المختلفة، بس الحقيقة أن الزوجات غالبًا ما بيضطروا لعمل حسابات كبيرة جدًا قبل اتخاذ أى قرارات مع الزوج، أو حتى المواجهة، بس فى نوعية تانية من الزوجات مش بتحسب وبتهد البيت على اللى فيه.. لذا يجب عليك عزيزى الزوج الانتباه الشديد قبل الدخول أو حتى الخروج من أى علاقة، والأعمار بيد الله وخد بالك على نفسك محدّش حينفعك.