كوكب تانى
منى رضوان
«كوكب تانى» أغنية معروفة لمدحت صالح صدرت فى ١٩٨٨.
الأغنية دى بمثابة واحد جاى لنا من المستقبل وبيدّينا الخلاصة وبيقولنا أنه رافض زمانه وأوانه ومكانه وعايز يعيش فى كوكب تانى.
تعالوا نسرح بخيالنا ونشوف لو فى كوكب تانى تم الإعلان عن وجوده هيبقى إيه التساؤلات اللىِّ عند الناس؟
مبدئيًا أكيد هيسألوا السفر له بڤيزا ولّا بالبطاقة ولّا إيه، وهل لو فى ڤيزا هيكون إيه إجراءاتها وبكام؟.
مع السؤال الأول هيبقى فى سؤال كيفية الانتقال للكوكب، هل بطيارة ولّا مكوك فضائى؟
بعد كده هييجى استفسار لو الكوكب ده من ضمن المجموعة الشمسية هنعيش عليه إزاى من غير جاذبية أرضية؟ موضوع إن مفيش جاذبية أرضية ده كويس لأنك سواء كنت تخين أو رفيع كده كده ملكش وزن وماشى طاير فى الكوكب زى العصفورة ومحدش هيقدر يقولك يا تخين ومش هتسمع كلام التنمر اللىّ بيتقال على كوكب الأرض.
نقطة تانية.. إحنا هنا بنسمى الكائنات اللىّ على الكواكب الأخرى كائنات فضائية، طيب لو احنا اللىّ رحنا كوكبهم هنبقى احنا اللىّ كائنات فضائية؟ ولو ده حصل هيعملوا فينا إيه وإحنا هارينهم تريقة ومصورنهم إن أشكالهم غريبة وعجيبة وبعين واحدة ولونهم أخضر؟ هينتقموا مننا.. تفتكروا؟
بالنسبة للمواصلات هتبقى عربيات وتاكسيات وأوبر ولّا كله هيبقى مَركبات فضائية وكل واحد معاه مَركبته؟.
تساؤل آخر مُلح وهام: احنا ناس بنحب الاستثمار، هينفع ناخد حتة أرض ونبنى عليها بيت مثلًا؟ طيب هينفع لو بنينا بيت إننا نختار شكل المبنى ولّا المبانى كلها شكل واحد والحى فى الفضاء هيعملنا إزالة؟
طيب بالنسبة للقوانين فى الكوكب الجديد، يعنى الجواز والطلاق وقوانين الأحوال الشخصية وقوانين العمل والمرتبات والمعاشات وكل ما يخص حقوق المرأة والطفل وضعهم إيه؟
متوقعة أسماء جديدة هتظهر زى زحل ابن الزُهرة أو عطارد بيطارد وطبعًا هيظهر دلع ومعاكسات على شكل: يا كويكب يا عسل ويا مذنب يا سكر وكده.
ننتقل لموضوع اللبس.. هنلبس إيه هناك؟ بدل الفضاء شكلها يخنق وحاجة صعبة الواحد يتحشر وينام ويقوم فيها.. طيب مفيش مثلًا لبس تانى على آخر صيحات الموضة؟ هو فى موضة فى الكواكب التانية؟
نقطة أخرى تثير الفضول عندى، لو رحنا كوكب تانى هيبقى فى إنترنت؟ أصل لو مفيش هيبقى وقف حال بصراحة هنعرف نشتغل ونتواصل إزاى؟
نقطة أخيرة وفاصلة هنتعامل فى الكوكب بالفلوس ولّا إزاى؟ وهل فى عُملة هنقيس عليها؟ فى دولار طيب واسترلينى ولّا كل كوكب له عُملته؟ الكواكب فيها بلاد ولّا هى بلد واحدة؟
أنا صدّعت من التفكير فى التساؤلات دى وشايفة إن كوكبنا أحسن واللىّ نعرفه أحسن من اللىّ منعرفوش. خلينا نسمع الأغنية وخلاص ونترك لخيالنا العَنان ليسرح كل فى كوكبه التانى.
